– Kan ikkje kommentere denne saka
Sjef for Midt-Telemark barnevernsteneste, Tone Sissel Hübenbecker, seier til Varden at ho ikkje kan kommentere kva som har skjedd i den aktuelle saka.
Som det går fram av hovudartikkelen, er advokat for det aktuelle foreldreparet, Sulman Maroof Hussain, kritisk til fleire avgjerder i Midt-Telemark barnevernsteneste
– Eg stiller meg litt uforståande til denne kritikken, seier Hübenbecker.
Gode løysingar
– Som følgje av teieplikta kan eg ikkje gå inn på realitetane i denne saka. På generelt grunnlag kan eg seie at barnevernet arbeider for å finne gode løysingar for barna. Dette er styrt av barnevernslova. Me må grunngje vedtaka våre, og partane kan anke vedtak inn for Fylkesnemnda. Viss Fylkesnemnda finn ut at vårt vedtak har skjedd på sviktande grunnlag, så vil det bli oppheva og barnet/barna plassert tilbake i heimen, seier Tone Sissel Hübenbecker.
Skånsam behandling
Ho seier at barnevernet prøvar å opptre så skånsamt som mogleg i alle saker.
– For oss er det viktig at barna har det bra. Det er alltid årsaker til vår framgangsmåte, og i nokre saker samarbeider me også med andre tenester. Situasjonen i ei barnevernssak kan endre seg, og det kan medføre at det vert gjort nye vedtak. Barnevernstenesta ønskjer å ha ein god dialog med foreldra, og foreldre blir informert om rettane dei har, opplyser Tone Sissel Hübenbecker.