Siri kan bli ny topp
Siri Blichfeldt Dyrland seglar opp som soleklar favoritt til fyrsteplassen på kommunevallista til Midt-Telemark Senterparti.
▶ Svært velinformerte partikjelder stadfester dette over for Varden. Nominasjonsarbeidet er i startfasen.
– Eg har ikkje blitt spurt enno, men vurderer sterkt å seie ja til ein slik førespurnad. I utgangspunktet er eg positiv, seier Siri Blichfeldt Dyrland i ein prat med Varden.
Jurist hjå Fylkesmannen
Ho er i «stallen» til fylkessekretær Sveinung Leikvoll, og tysdag kveld var ho ei av dei yngre partifolka som var i møte og skulering med partileiar Trygve Slagsvold Vedum.
Blichfeldt Dyrland er opphavleg frå Vardø. Ho er utdanna jurist og arbeider i dag med helsesaker hjå Fylkesmannen i Telemark. Ho har tidlegare jobba både i Nav og Mattilsynet, og har såleis solid røynsle frå offentleg sektor.
Den samfunnsengasjerte Sp-kvinna har budd i Bø sidan 2002, er gift og har tre barn i alderen 7–21 år.
– Eg er blitt veldig glad i Bø med sine fjell og vatn, og saknar ikkje havet, seier kvinna frå Finnmark.
Siri er i dag 1. vararepresentant til styret i Midt-Telemark Senterparti. Ho har så langt markert seg med avisinnlegg her i Varden om blant anna sentralisering – innlegg som har skapt svært stort engasjement.
Til Varden seier Blichfeldt Dyrland at ho ser med uro på utviklinga her i landet.
– Distrikta mistar viktige funksjonar som sjukehus og politi, og det vert større skilnad mellom fattig og rik. Eg vil engasjere meg, seier Sp-politikaren.
Verdfull røynsle
Ho jobbar no mykje med helsesaker frå heile Telemark, og trur dette kan vere verdfull røynsle å ha med seg inn i det politiske arbeidet i Midt-Telemark kommune, som trer i kraft 1. januar 2020.
– Kva synest du om at Bø og Sauherad går saman?
– Eg var skeptisk og røysta nei, men er blitt meir positiv etter som eg har sett utviklinga. Den nye kommunen vil ha tenester nær folk.
– For den nye kommunen blir det svært viktig å passe på høgskulen vår. Med ny teknologi har distrikta store moglegheiter. I den nye kommunen blir det viktig med ei rettferdig fordeling av funksjonar. Bø må ikkje få alt, avsluttar Siri Blichfeldt Dyrland.
Eg var skeptisk og røysta nei, men er blitt meir positiv etter som eg har sett utviklinga.
Siri Blichfeldt Dyrland, Senterpartiet
▶ Halvor Ulvenes