Opnar arkiv med skattar
Bø lokalhistoriske arkiv har vore stengt i seks år. Tysdag kveld blir dei mange kulturskattane igjen tilgjengelege for publikum.
– I skuleåret kjem arkivet til å vere ope kvar tysdagskveld i to timar. Da kan publikum kome for å sjå på det me har på Oterholt og bestille materiale som ligg brannsikkert i Sparebanken Din og kommunehuset. Materialet frå arkivet kan me finne fram til neste tysdagskveld, seier mangeårig styrar Finn Rønning til Varden.
No er han pensjonist, men jobbar vidare på dugnad for museet på Oterholt. Tysdag kveld blir arkivet offisielt opna i lokalet «Polen».
Finn Rønning opplyser at det nye opplegget - med ope arkiv ein kveld i veka - er etter ein dansk modell.
Stor samling
Bø lokalhistoriske arkiv har ei lang historie. Det vart etablert i 1980-åra av Bø kommune som gjorde avtale med Bø Museum om drifta. Gjennom åra har det fått over 200 private arkiv - frå lag, organisasjonar og personar.
Vidare har Bø lokalhistoriske arkiv bygd opp ei samling med aviser som har stoff frå bygda, pluss eit stort klipparkiv. Bladet «Norig», lokale tidsskrift og kart er andre delar av samlinga. Vidare har museet kring 5.000 foto frå gamle Bøherad som er blitt digitalisert.
Trekte seg ut
I 2004 vart det avtale mellom Bø Museum og Telemark Museum. Etter kvart reduserte Bø kommune støtta til Telemark Museum. Leiinga i Skien svara med å leggje ned Bø lokalhistoriske arkiv, der det ikkje har vore drift sidan 2012.
Sidan har Bø Museum trekt seg ut av Telemark Museum, og er i dag igjen ein sjølvstendig institusjon. Ivrige dugnadsarbeidarar ved museet stiller stadig opp og samlar nye klipp frå aviser med stoff knytt til bygda.
Viktige kjelder
Elles har Bø lokalhistoriske arkiv mange skattar etter mellom andre sogeskrivar Gregar Nordbø og sonen Olav Nordbø. Materialet til Gregar Nordbø var ei viktig kjelde da Stian Henneseid i 1970- og 80åra skreiv Bø-soga i fire band.
I arkivet finn ein òg dei mange artiklane til Vardenkorrespondent Knut H. Nordbø, som var bladmann på bygda i kring 60 år.