Ny vri på utstilling
Statkraft har no fornya visingssenteret om Tokkeutbygginga på VestTelemark Museum.
Der får publikum eit eineståande innblikk både om kraftproduksjon og utbygginga, som starta i 1956. Den skapte datidas største kraftanlegg i Nord-Europa.
200.000 husstandar
Tokke-verka kan forsyne 200.000 husstandar med elektrisk straum i eitt år, og produksjonen er 4,4 terawatt.
Hovudutbygginga gjekk føre seg i perioden 1960-70, men Tokke-anlegget var fyrst fullført i 1987, med utbygginga av Hogga kraftverk i Lunde.
Statkraft Energi, Region Sør har hatt vasskraftutstilling på Vest-Telemark Museum i fem år. I fjor haust bad Statkraft om hjelp frå museet til å fornye og oppgradere senteret.
Fyrste trinn er no klart etter samarbeid med museumsfagleg ansvarleg Tilman Hartenstein.
Flott modell
Ei nyskaping er eit digitalt visingssenter, med ein flott 3D modell av nedslagsfeltet til Tokke-utbygginga. Aasmund Nordstoga fortel der historia om Tokke-utbygginga.
NVE og Tokke-utbygginga hadde eigen fotograf, Jostein Granli, som følgde anleggsarbeidet. Mange av dei kring 6.000 digitaliserte bileta er ein del av vasskraftutstillinga som gjev ein unik dokumentasjon av det som skjedde i førre hundreår.
Administrasjonssjef Hege Jonassen Verpe i Statkraft seier at trinn to skjer ned år, der dei vil kome med ein modell kor ein kan lære om kraftproduksjon via spel. Visingssenteret blir mykje bruka, og den 4. juni kjem det til dømes ei gruppe frå Chile, India og Brasil kome til museet for å lære meir om kraftutbygging.
– Det er viktig å få fram det faglege innhaldet, seier Hege Jonassen Verpe, som er full av lovord om samarbeidet med museet.
Ein revolusjon
Direktør Dag Rorgemoen ved Vest-Telemark Museum er svært glad for samarbeidet med Statkraft.
– Utbygginga skapte ein revolusjon i regionen. Den gav både verdiskaping og folk fekk lønna arbeid. Vidare lærte ein mykje om bygg og anlegg, seier Dag Rorgemoen.
Han fortel at den fyrste skuleklassa alt har besøkt visingssenteret, og at det blei ein fulltreffar.