Stor skilnad på leigeprisane
Det interkommunale selskapet betalar årleg tomteleige på 110.447 kroner per dekar. I ei privat avtale på nabotomta er tilsvarande sum 7.272 kroner.
Det er renovasjonsselskapet Irmat, eigd av kommunane Bø, Hjartdal, Notodden og Sauherad, som har leigd areal av selskapet Brenna Stasjon AS. Tomta ligg på grensa mellom Bø og Sauherad og skal nyttast til avfall frå hushaldningane i Bø og Sauherad. Utleigar er Brenna Stasjon as, eigd av selskapet Babord AS som er kontrollert av Jørn Pettersen på Stathelle.
Slik er avtala
Partane underteikna avtala 11. januar 2017. Varden har kopi av den signerte kontrakten som gjeld fram til 30. juni 2040. Den kan ikkje seiast opp i perioden.
Leigesummen for sjølve tomta på 6.700 kvadratmeter er 740.000 kroner. Det gjev ei tomteleige på 110.447 kroner per dekar. I tillegg skal Irmat betale 150.000 kroner for eit lager på 350 kvadratmeter, pluss 20.000 kroner i felleskostnader. Total årleg leigesum er derfor 910.000 kroner.
Den private avtala
Ingebret Storkaas, som eig nabotomta på elleve dekar, opplyser til Varden at han leiger ut den gjennom selskapet sitt Ingebrets Storkaas AS til firmaet Notevarp A/S, eigd av Arne Moen. Årleg leigesum der er no 80.000 kroner - eller 7.272 kroner per dekar. Storkaas opplyser at kontrakten frå 2002 lydde på 60.000 kroner, etter takst og med regelmessig indeksregulering. Leigetakar Arne Moen stadfester beløpet.
– Eg er fornøgd med leigesummen og synest at dette er lettvinte pengar, seier Ingebret Storkaas.
Eg synest dette er pengesløseri og vil be om at kontrollutvalet i Bø kommune tek tak i saka.
Arvid Hagen, leiar i Bø Ap
Sjokkerande pris
Leiar i Bø Ap, Arvid Hagen, er opprørt over avtala til Irmat.
– Ein sjokkerande pris. Eg synest dette er pengesløseri og vil be om at kontrollutvalet i Bø kommune tek tak i saka. Her er det mykje rart, og derfor ønskjer eg at saka vert skikkeleg belyst. Eg stiller spørsmål kvifor det kommunale selskapet ikkje kjøpte tomta sjølv, seier Hagen til Varden. Han fryktar at innbyggjarane får svi gjennom høgare kommunale avgifter.
– Det er rart at kommunen ikkje kan bruke Bø Miljøstasjon. Både Bø og Sauherad har godkjende stasjonar. Det er snakk om lite avfall - kring 1.200 tonn i året, seier Arvid Hagen.
Like dyrt
Styreleiar Eivind Eckbo i Irmat seier til Varden at kostnadene til utleigar er utgangspunktet for avtala. Han opplyser at styret har etterkome bestillinga frå kommunane Bø og Sauherad om ein miljøstasjon på kommunegrensa, og at alternative leigekostnader vil vere på same nivå.
– Kommentar til kritikken frå Arvid Hagen?
– Det er rart at han ber kon- trollutvalet sjå på saka. Kontrollutvalet i Bø, der Ap har leiaren, har sjølv bede om at Telemark kommunerevisjon ser på Irmat. Det er underleg at Ap-leiaren ikkje har fanga opp dette. Ein bør derfor vente på rapporten frå kommunerevisjonen. For Irmat var det uaktuelt å kjøpe tomta. Salet kom så brått på at selskapet ikkje hadde ordna finansiering, og dessutan var ikkje tomta da regulert til vårt føremål. Me kunne me ikkje kjøpe ei tomt som ikkje var regulert til miljøstasjon, seier styreleiar i Irmat, Eivind Eckbo.
Utleigar Jørn Pettersen seier til Varden at han ikkje ønskjer å kommentere leigeavtala med Irmat.