Vil ha full gjennomgang
Formannskapet vil ha full gjennomgang av Gullbring Kulturanlegg. Det kan koste inntil 300.000 kroner.
Måndag gjorde dette politiske organet i Bø ei tilråding til kommunestyret om å løyve inntil 300.000 kroner til ein ekstern gjennomgang.
Svak likviditet
Bakgrunnen for saka er den vanskelege økonomiske situasjonen med at eigenkapitalen er brukt opp og selskapet har svak likviditet. Styreleiar Arne Rui sa til Varden sist veke at selskapet i realiteten er konkurs. I saksutgreiinga går det fram at Gullbring Kulturanlegg AS har eit samfunnsansvar for å leggje til rette for aktivitetar og opplevingar, samt helse og levekår for innbyggjarane. Rådmann Åse Egeland skriv vidare at i ein ny kommune vil Gullbring ha ei spesielt viktig rolle som attraksjonsfaktor for busetjing og lokalisering.
God stemning
I ordskiftet peika ordførar Olav Kasland (V) på at det ikkje finst personalutfordringar i Gullbring, og at det er god stemning mellom dei tilsette. Han viste til at styret skal tilsetje ny dagleg leiar, noko nestleiar Svein Arntsen får ansvaret for. Kasland skisserte ulike moglegheiter for Gullbring. Ifølgje Kasland kan eit alternativ vere at kommunen tek over alle aksjane. Han nemnde vidare at Bø kommunale eigedomsselskap tek over drifta, eller at det vert ei samdrift med kommunen. Kasland stilte vidare spørsmål om to millionar kroner i overføring frå kommunen er tilstrekkeleg.
Glenn Isaksen (Ap) støtta ordføraren, og sa at ein gjennomgang er på sin plass.
– Dette trur eg blir veldig bra, sa han. Bergit Askildt Myrjord (V) meinte det er viktig å undersøkje breidda og kva kommunen må betale framover.
Varaordførar Borgar Torbjørn Kaasa (Sp) sa på si side at ei langsiktig løysing er viktig, slik at dei tilsette veit kva dei har å halde seg til.
Kven styrer i Gullbring?
Asbjørn Botnen (H) sa fyrst at han ikkje er glad for ein slik gjennomgang.
– Her er det noko som ikkje heng saman. Kven er det som bestemmer i Gullbring? spurde Høgre-representanten som viste til at anlegget har hatt svaert mange leiarar gjennom dei snart 25 år.
– Eg vil tru at talet ligg på 15-20, seier Botnen til Varden.
Bergit Askildt Myrjord repliserte at det Botnen peikar på er gode argument for ein ekstern gjennomgang.