Kasland om Irmat: – Alt gjort etter boka
Ordførar Olav Kasland meiner politikarane har gjort alt etter boka i Irmatsaka.
▶ – Både den nye styreleiaren og alle ordførarane er samstemte om korleis saka er handtert. Me har elles veldig stor tillit til at vår nye styreleiar Helge Granlund skal handtere saka på ein god måte, seier Kasland til Varden.
– Me har retta oss etter kommunestyrevedtaket frå 29. oktober 2012 om miljøstasjon på grensa mellom Bø og Sauherad som fekk fleirtal mot åtte røyster. Der låg ikkje eksakt val av tomt inne. Vedtaket opna for at stasjonen kunne plasserast i naerleiken av kommunegrensa. Vedtekter og aksjonaeravtale er klare. Irmat har fullmakt til å styre dette. Føresetnaden er høg kvalitet til låg pris på renovasjonsavgifta, seier Kasland.
Orientert gjennom Varden
– Når blei du orientert om leigeprisen på over 110.000 kroner per dekar?
– Det var gjennom oppslaga i Varden. Når prisen blei slik, hadde det vore lurt av Irmat å ta avtala tilbake til kommunestyra.
– Ser du nokon veg ut av avtala?
– Det blir ekstraordinaer generalforsamling etter ferien. Der blir kontrakten tema. Fullmakta til styret er ei ramme på 28 millionar kroner.
– Føler du at det er stråmenn i saka?
– Det vil eg ikkje spekulere i.
Ikkje «feiga» ut
– Fleire lurer på kvifor Bøordføraren ikkje har delteke på dei to siste generalforsamlingane i Irmat?
– Dei som trur eg har «feiga» unna kjenner meg dårleg. Siste generalforsamling var det fylkesting, og der er det lovpålagt å møte. Elles er det formannskapet som har valt representant til generalforsamlinga ikkje ordføraren.
– Varden har fått tips om at du har hatt fleire møte med Odd Sunde?
– Eg kjenner ikkje mannen. Dette er galskap. Eg har berre levert søppel på mottaket - aldri snakka med Sunde på kontoret hans.
– Kor ofte har du snakka med tidlegare styreleiar Eckbo, om saka?
– Kanskje ein gong i året mellom generalforsamlingane.
På trygg grunn
– Burde ikkje du og andre politikarar vore meir «på» i saka?
– Eg bad om forvaltingsrevisjon og bø kommune tok opp kryssubsidiering på generalforsamlinga i fjor. Alt er gjort etter boka, så eg føler meg 100 prosent trygg i denne saka.
– Burde ikkje politikarane etterlyst pris for stasjonen som er bestilt?
– Mandatet er som nemnd at Irmat skal gjere dette på rimelegaste måte. Me kan ikkje spørje om noko me ikkje veit. Kommunen har handtert saka etter alle reglar. Bø er minoritetsaksjonaer med 24 prosent, så me eig ikkje Irmat åleine.
– Kvifor blei ikkje Bø Miljøstasjon vurdert?
– Det må du spørje Irmat om. – Forstår du at fleire i Bø lurer på kvifor du er så lite informert - enten det dreier seg om momssaka for nokre år sidan eller Irmat?
– Eg aksepterer ikkje spørsmålet. Eg har vore nok på i sakene og handlar etter vedtak i mitt eige kommunestyre. Ordførarane kan heller ikkje engasjere seg i kvar sak. Det som skjer vidare er at kontrollutvalet i vertskommunen Notodden til hausten skal behandle rapporten frå Telemark kommunerevisjon om Irmat, avsluttar ordførar Olav Kasland.
▶ Halvor Ulvenes