Per Anders til topps for fjerde gong
Telemark forsvara med glans den sterke posisjonen innanfor folkemusikk. Per Anders Buen Garnås vann Landskappleiken i hardingfele klasse A for fjerde gong.
Per Anders Buen Garnås frå Bø vann hardingfele klasse A på Landskappleiken for fjerde gong. Telemark har no 49 sigrar i den prestisjefylte konkurransen.
– Veldig moro. Eg følte at båe slåttane i finalen gjekk like bra, seier den blide vinnaren frå Bø i ein prat med Varden rett etter premieutdelinga. Det var enorm stemning i Trysilhallen da premielista vart offentleggjort sundag ettermiddag.
Ny siger
I finalen spela Per Anders slåttane «Tinnemann» og «Veneflamma». Det gav siger før Alexander Aga Røynstrand, Hardanger, og Lars Ingar Meyer Fjeld, også busett i Bø. Per Anders vann også denne klassa i 2003, 2010 og 2013.
– Eg har slite litt med fingrane, men no fungerer det bra ein siger i seg sjølv. Og så er det viktigast at pokalen kjem til Bø, seier Per Anders med eit smil. Dette var siger nr. 49 i hardingfele klasse A til Telemark.
Mange gode frå Telemark
Det var elles mange gode plasseringar frå fylket vårt på stormønstringa som vart avslutta sundag ettermiddag. I dans hardingfele klasse C fekk seljordjenta Gjertrud Raftevold Rue 2. plass. Den delte ho med saman med Vilde Ellegaard Westeng frå Gransherad og Neri Sørnaes Bakkjen. Dei var berre eitt poeng etter vinnarane Erland Voldhaug Andersen og Ingrid Svennaes frå Valdres. Sistnemnde oppnådde 71 poeng.
Briljerte i halling
16 år gamle Vilde Ellegaard Westeng delte tredjeplassen i halling C med 74 poeng. Her var ho tre poeng etter vinnaren Nikolai Bo Fischer Nielsen frå Nesodden. Knut Boksasp Berge frå Tinn vart nummer fem i same klasse med 73 poeng.
Mor hans, Unni Boksasp vart nummer tre i vokal klasse A, tre poeng etter vinnaren Margrete Nordmoen frå Trysil-Knut Dans- og spelmannslag.
I dans hardingfele klasse D fekk Aud Manheim, Seljord og Kristian Hanto, Nome 3. plass. Manheim fekk òg fjerdeplass i same tevlinga saman med Johan Vaa frå Rauland.
Fekk pris
Elles fekk Gransherad Spel og dansarlag «Gnist-prisen» på 15.000 kroner. Kari-Anne E. Westeng tok imot prisen på vegner av laget som det blei blåse liv i for åtte år sidan.