Sparka rådmann i luk
Eit fleirtal i Notodden kommunestyre sparka rådmann Svein Aannestad bak stengde dører.
▶ Vedtaket blei gjort i eit ekstraordinaert møte torsdag kveld, med 25 mot 16 røyster. Voteringa fann stad litt over klokka 20, etter eit ordskifte på kring ein time. Det var skriftleg votering, men høgst sannsynleg var det koalisjonen beståande av Ap, Sp, KrF og Raudt som sa ja til sluttavtala med rådmannen. Den betyr at kommunen må ut med naermare to millionar kroner til rådmannen. Han går av fredag 6. juli som rådmann, men er tilsett i kommunen fram til 1. oktober.
Langt ordskifte
Ordførar Gry Fuglestveit (Ap) foreslo stengde dører, og peika på at dette var i tråd med råd frå kommuneadvokat Frode Lauareid. Ho viste til paragraf 31 i kommunelova, og at saka galdt ein tilsett i kommunen. Før stenginga av møtet, var det eit lengre ordskifte og to gruppemøte om både utsetjing og lukka dører.
Mangla dokumentasjon
Else Solberg Aasen (SV) ønskte å utsetje handsaminga av saka fordi ho meiner det mangla dokumentasjon, men framlegget blei avvist, med 25 mot 16 røyster. Deretter argumentere ho for opne dører. SV-representanten viste til at sluttavtala er offentleg og at det ikkje finst personleg informasjon der. Ho meinte derfor at det ikkje kunne kome fram personlege forhold i ordskiftet. Solberg Aasen spurde om grunngjeving for å stenge møtet. Varaordførar Torgeir Bakken (Ap) viste til at kommunen ønskjer å følgje norsk lov.
«Snev av truverd»
Kommuneadvokat Frode Lauareid var heilt klar på at møtet måtte gå for stengde dører. Gruppeleiar for opposisjonen, Tonje Brokke frå Høgre, ville ha ope møte. Ho sa at det ikkje vil kome fram sensitive opplysningar, og understreka at Notodden kommune skal vere ein raus og open kommune.
– Skal me ha eit av snev truverd, må møtet vere ope, sa Tonje Brokke. Ho viste òg til at Gunnar Bodahl Johansen i Norsk Presseforbund meinte møtet burde går for opne dører sidan rådmann Svein Aannestad sjølv ønskte opne dører. Kommuneadvokat Lauareid sa at han ikkje var samd i dette.
«Ganske spesielt»
Rådmann Svein Aannestad, som ikkje var til stades i møtet, ønskte ikkje å kommentere avgjerda i kommunestyret torsdag kveld.
– Eg vil vente til det roar seg litt, seier Aannestad som går av som rådmann fredag 6. juli. – Ønskte du ope møte?
– Eg har ikkje blitt spurt av ordføraren om dette, noko eg synest er ganske spesielt. Eg visste heller ikkje at kommunen sin advokat skulle vere til stades i kommunestyret, svarar den avtroppande rådmannen.
– Du gjekk også av som rådmann i Ringerike med umiddelbar verknad?
– Det var ei heilt anna sak, avsluttar Svein Aannestad. Ordførar Gry Fuglestveit sat i lukka møte om konstituering av ny rådmann, og Varden fekk derfor torsdag kveld ingen kommentar frå henne til uttalen frå rådmannen.
▶ Halvor Ulvenes ▶