Bø Sommarland ligg over fjoråret
Bø Sommarland har hatt større besøk enn på same tid i fjor.
– Interne retningsliner gjer at eg ikkje kan opplyse noko eksakt besøkstal. I juni i fjor hadde parken 30.000 besøkande, men da var det regn alle helgene i den månaden. No ligg me føre same tid i fjor. Eg er fornøgd, opplyser direktør Renè Langeveld Sas til Varden.
2017-sesongen enda med eit besøkstal på over 143.000.
Langeveld Sas opplyser at dagsrekorden så langt i 2018 er 5.500 personar. På det direktesende TV-showet i samband med Sommarland Skifestival sist veke var det over 3.000 menneske.
Gidd ikkje vente
Han opplyser at nordlendingane har tjuvstarta ferien i år.
– I Bodø må folk gå med ulltrøye, så overnattingsbedriftene melder at nordlendingane har teke turen sørover tidlegare. Dei gidd ikkje vente på finvêret, seier Sommarland-direktøren.
– Det kan ikkje bli for fint vêr også for Sommarland?
– Ein del tørre parkar opplever nok det, men ikkje for oss som har vasstilbod. I vårt leikeland er det derimot ingen aktivitet. Der blir det for varmt. Folk vil berre vere i vatnet på slike dagar, seier Renè Langeveld Sas.
– Det er duka for høgare besøk enn i fjor?
– Vêret framover vil avgjere dette, svarar han.
Naer 300 jobbar
Sommarland-direktøren opplyser at i underkant av 300 ungdommar har sommarjobb i parken.
– Det er berre å ta av seg hatten for den jobben dei gjer. I denne varmen kan det vere krevjande å vere tilsett.
Som følgje av større besøk, aukar også utgifter til lønn. Det føler toppsjefen er eit luksusproblem.
Stort vassforbruk
Han opplyser at plenane er gule i tørken.
– Me har valt å følgje vatningsforbodet til kommunen og ikkje vatne grøntområda. Det er viktigare å få noko vatn i anlegget.
– Sommarland er den største vasskunden i Bø, men eg har ikkje tal no på det daglege forbruket. Det varierer, seier Renè Langeveld Sas.
Det er stor brannfare i skogen, og bedrifta har derfor mellom anna stoppa all kantslått.