Utstilling på dugnad
Eldsjelene har arrangert utstilling i over 25 år. Igjen byr dei på variert kunst i det gamle dampfargeriet.
Hørte Dampfarveris Venner har 63 medlemmer, og denne helga opnar dei salsutstillinga med foto, måleri, akvarellar, keramikk og tekstil og teikningar.
Kunstnarane Ive Hagen, Arne Kleng Dahle, Øivind Engeland, Sølvi Strand, Kristin Eidem, Turid Schelver, Torunn Myrann, Nina Resch, Unni Spakmo samt Årvoll Keramikk er representerte.
Eiga gudsteneste
Utstillinga opnar i dag, laurdag, og i morgon er det tradisjonsrik messe på Gårahaug i Bø. Etterpå er det kyrkjekaffi på fargeriet, som vart bygd i 1878 av Christen Andersson Hørte.
Onsdag 11. juli er det rusletur til Kjerremyr og Helgehøl, med Peter Sevatdal som guide.
– Laurdag 11. juli er det aktivitetsdag - med plantefarging, spinning, veving , spikking og brodering, fortel primus motor Anne W. Hørte.
Nytt av året er også at det er slege opp ei flott tavle med informasjon om Hørteverket.
Lang historie
Gjennom 250 år var det mykje industri langs Hørteleva, som ligg på grensa mellom Bø og Sauherad. Frå 1691 og framover var det bygde opp tre hamrar knytt til Holden jernverk. Denne verksemda var på båe sider av elva.
Halvor Borse bygde den eldste hammaren på Moen i slutten av 1680-åra. Her vart det og bygd eiga kolahus, og jorda er framleis svart av trekol på staden.
Den eldste mølla, Øvre Mølle, vart ført opp i 1868. Den blei rive, og nytt anlegg sett opp 13-14 år seinare.
Staden fekk eigen landhandel sist i 1870-åra. Anthon C. Hørte dreiv den fram til konkursen i 1889. Det vart så skifte av eigarar fram til 1911 da Olav E. Kåsa kjøpte eigedomen. Han dreiv den saman med kona fram til 1960.
Eiga sag
Hørte hadde også eiga sag. Den er fyrst nemnd i 1856. Det vart bygd ny sag i 1915 som var i drift saman med mølla til båe verksemdene brann for 50 år sidan - i 1968. Oberstløytnant Waldemar Rye bygde «kapteingarden», også kalla «Rye-garden», på Hørte ring 1834. Han bygde opp eit gardstun med samanhengande bygningar på tre sider og ope mot bygdevegen på den fjerde. Denne soga om Hørteverket kan gjestene på utstillinga få med seg på den nye informasjonstavla.