Tente 100 mill. i fjor
Vest-Telemark Kraftlag (VTK) tente nesten 100 millionar før avskrivingar i fjor. Før skatt blei overskotet 44,3 millionar kr.
– Det er ny rekord. Me er godt fornøgd med resultatet, seier administrerande direktør Ketil Kvaale til Varden.
– Flår de kundane?
– Nei, tvert i mot. Nettleiga er ikkje justert sidan 2015, men me ligg likevel høgt der på grunn av topografien i vestfylket, svarar VTK-sjefen.
Har delt ut naer 400 millionar
Dermed dryp det også godt på eigarane. Styret vedtok eit utbytte på 22 millionar kroner som blir fordelt mellom kommunane Tokke, Vinje, Seljord, Kviteseid, Fyresdal og Nissedal. Dei fem fyrste har 19 prosent kvar medan Nissedal eig fem prosent av aksjane.
Kraftlaget er såleis ei god «mjølkeku» for kommunane. Sidan 1999 er det blitt delt ut 389 millionar kroner. Dette betyr at dei fem likestilte aksjonaerane har fått i underkant av 74 millionar kroner kvar og Nissedal kring 19,5 millionar kroner i denne perioden.
Trass i store utbytte, er VTK botnsolid. Ved inngangen til 2018 hadde bokført eigenkapital passert 340 millionar kroner.
Våtare og varmare
Kvaale seier at fjoråret blei våtare og varmare enn normalt.
– VTK kjem godt ut på effektivitetsmålinga til NVE, noko som gjer at me får eit bra driftsresultat. Rekneskapen for nettet syner same nivå som i 2016, opplyser VTK-sjefen vidare.
Selskapet investerte 60 millionar kroner i 2017. Den største satsinga var overgang til automatiske straummålarar. Vidare gjekk om lag ein tredjedel av investeringane til utbygging av fiber. Straumtilførsel til hytteområdet Stokketjønn på Bykleheia var òg ein av dei store satsingane i fjor.
– Der er det kring 100 hytter no. Området har venta på elektrisitet i 20 år, seier Ketil Kvaale.
Løn og honorar
Elles syner notane til rekneskapen at toppsjefen i fjor hadde ei løn på i overkant av 1,2 millionar kroner.
Samla godtgjersle til styret utgjorde 412.565 kroner. Ordførar i Fyresdal, Erik Skjervagen er styreleiar i selskapet.
▶ Halvor Ulvenes