Startar ny bedrift
Dei fann kjaerleiken på eit landsmøte. No har Agnes og Svein Inge starta ny bedrift.
▶ Bertelsen Nyhuus Optikk er namnet på den aller nyaste forretninga i Bøgata.
Den opna måndag morgon, og bak verksemda står optikarane Agnes Holtskog Nyhuus (26) og Svein Inge Bertelsen (33).
Båe har optikarutdanning frå Kongsberg og dei har arbeidd i Krogh Optikk.
Langsiktig
– Me har tru på å levere kvalitet til ein fornuftig pris, seier det blide ekteparet.
Dei er lokalisert i Vertshusbygget i Bø sentrum. Der har dei investert i nytt utstyr for å kunne gjennomføre grundige synsundersøkingar.
– Me likar yrket godt og draumen har alltid vore å kunne starte for seg sjølv. Her kan me styre vår eigen kvardag og yte god service til kundane, seier Agnes og Svein Inge.
Han har også teke ekstra utdanning på kontaktlinser.
Odelsjente
Agnes er også yngstejenta på fruktgarden Nyhuus i Sauherad, men det er 26-åringen som skal føre familiebruket med 12.000 eple- og plommetre vidare.
– Syskena mine ønskte ikkje å overta, og eg har alltid hatt lyst til å bu på garden. Eg skal overta eigedomen i løpet av ein periode på tre-fem år, men slik det er blitt i dag er ein nøydd til å ha inntekt utanom. Framover blir det fullt fokus på å vere optikar, seier Agnes.
Frå Harstad
Svein Inge kjem frå Harstad, der faren arbeidde som optikar, så han har vakse opp med faget.
Det unge paret trefte kvarandre på landsmøtet i Norges Optikerforbund for fem år sidan.
– Det var kjaerleik ved fyrste blikk, seier Agnes.
Familien er sidan blitt utvida med ein liten gut som snart fyller eitt år.
Tenkjer langsiktig
Dei nye bedriftseigarane, som har eige aksjeselskap, er fullt klar over at det tek tid å innarbeide ei ny bedrift.
– Det er eit godt optikarmiljø i Bø og me tenkjer langsiktig. Det gjeld å ha litt is i magen, seier Svein Inge Bertelsen.
Halvor Holtskog, far til Agnes, driv med grafisk design.
– Me har hatt svaert god hjelp av han til både å profilere den nye bedrifta og lage trykksaker for oss, seier dei nye drivarane i Bøgata. ▶ Halvor Ulvenes