Refsar sine eigne
Eit hastesak i Hjartdal kommune rett før ferien skaper politisk bråk.
▶ Det var onsdag 27. juni at hastesaka i planutvalet - som omhandla uttak av drikkevatn frå Sjåvatn i Tuddal - vart handsama. Dette prosjektet har tidlegare skapt stor strid i kommunen, både blant grunneigarar, hyttefolk og folkevalde.
Saka denne gongen gjaldt søknad frå det kommunale selskapet Russmarken VA om dispensasjon frå kommuneplanen for rørtrase, pumpehus, tilkomstveg og masseuttak. Det var framlegg i møtet om å utsetje saka, men det fall med fire mot to røyster. Deretter vart rådmannen si tilråding om dispensasjon frå kommuneplanen vedteke samrøystes.
Kom etterpå
Før møtet skjedde følgjande: Måndag 25. juni melde utvalsleiar Audun Solberg (KrF) forfall. Dagen etter kom det epost frå administrasjon i Hjartdal kommune om at søknaden frå Russmarken, som er datert 9. mars i år, skulle opp som ekstra sak.
Uheldig sakshandsaming
Utvalsleiar Audun Solberg er kritisk til det som har skjedd. Det har han uttrykt både i lesarbrev til avisene og over for Varden.
– Det har vore ei uheldig sakshandsaming. Partia og representantantane har ikkje fått god nok tid til å setje seg inn i saka. Eg fekk heller inga orientering om at den skulle opp i utvalet om to dagar, det kan vere tilfeldig, seier Solberg til Varden. – Det var to forfall og ein representant var inhabil. Dersom det ikkje hadde vore forfall, ville det blitt fleirtal for å utsetje saka til neste møte, legg KrFpolitikaren til.
Inga enkel sak
I lesarbrevet, som stod på trykk her i avisa sist torsdag, skriv Solberg at han fyrst fekk melding om saka om ettermiddagen tysdag 26. juni.
– Det var inga enkel sak. Saka handlar om dispensasjonssøknad om å lage 2,4 kilometer veg til Sjåvatn, fire kilometer rørgate for vatn, pumpehus ved Sjåvatn og masseuttak på inntil 5.000 kubikkmeter i samband med arbeidet. Det tilsvarar 500 billass, skriv utvalsleiaren.
Dispensasjon
Administrasjonssjef i Hjartdal kommune, Anne Bamle går i rette med sin eigen utvalsleiar, Audun Solberg.
– Dette var inga vegsak, men ein dispensasjon frå kommuneplanen. NVE har tidlegare gjeve konsesjon for bygging av veg, understrekar Anne Bamle.
– Kvifor varsla du ikkje Solberg om at saka skulle opp da han melde forfall?
– Det blei fyrst klart dagen etter. Elles har både Solberg og utvalet tidlegare gjeve uttrykk for at at saker skal kome opp så raskt som mogleg. Når Solberg snakkar om at saka ville blitt utsett, forskotterer han kva utvalsmedlemmene ville ha røysta, seier Anne Bamle.
Full tillit
Ordførar Bengt Hallvard Odden (Ap) seier til Varden at han har full tillit til rådmannen. Odden var til stades i møtet 27. juni.
– God forvaltningsskikk er følgd. Det er opp til utvalsmedlemmene å avgjere om sakshandsaminga er forsvarleg. Utvalet har også tidlegare handsama saker på kort varsel.
▶ Halvor Ulvenes