Kasland vil slutte som ordførar
Olav Kasland søkjer fritak frå vervet som ordførar i Bø.
Olav Kasland søkjer om fritak frå ordførarvervet i Bø. Bakgrunnen er at han har fått ny jobb. Professor Bernt Aardal meiner det er for lett å få fritak.
Kasland stadfester dette sjølv over for Varden. Bakgrunnen er tilbod om ny jobb.
Etter det avisa får opplyst, ligg det i korta at Borgar Torbjørn Kaasa frå Senterpartiet overtek som ordførar medan Evy Beate Tveter (V) truleg vert ny varaordførar. Venstre vil foreslå henne.
Tveter blir listetopp for MidtTelemark Venstre ved kommunevalet neste haust.
Blir direktør
– Eg ber om fritak frå 1. november i år. Bakgrunnen er at eg er tilbydd ei nyoppretta stilling som fagdirektør i Forbrukarrådet i Oslo. Når det gjeld denne stillinga, er det no eller aldri. Forbrukarrådet kunne ikkje vente til eg er ferdig som ordførar ved årsskiftet i 2020, opplyser Bø-ordføraren til Varden.
Han skal jobbe internasjonalt, og viser til at mange forbrukarsaker blir styrt frå Brussel gjennom EØS-avtala.
Litt av jobben blir derfor også å vere lobbyist for Noreg i ulike forbrukarsaker.
Kasland har vore ordførar sidan 2011, da Venstre gjorde eit brakval i Bø og fekk ni av 25 representantar i kommunestyret.
Skal bu i Bø
Kasland fortel at søknaden hans vil kome til handsaming i kommunestyret 15. oktober.
– Eg ber ikkje om fritak frå vervet som kommunestyrerepresentant, for eg skal framleis bu i bygda. Eg held også fram som medlem av fylkestinget, seier Kasland.
– Kva seier lovverket?
– Det er opp til kommunestyret å avgjere dette, seier Kasland, som stadfester at han har drøfta saka under handa både med eiga gruppe og opposisjonen.
– Dei har forståing for situasjonen min, seier han.
Takka nei
Frå tidlegare er det kjend at han har takka nei til ein ny periode som lokalpolitikar i Bø.
Kasland seier at han har hatt permisjon frå Forbrukarrådet i sju år, og at det i seinare tid har vore ein prosess om framtida hans i organisasjonen.
– Dei ønskte meg i denne stillinga, og det ser eg på som ei stor aere, seier bøheringen som tidlegare har internasjonal erfaring både frå Norad og Raudekrossen.
– Eg gler meg veldig til denne jobben og det å få jobbe internasjonalt igjen, seier den øvste politikaren i Bø.
Kommune i vekstHan
kan vise til imponerande vekst i folketalet gjennom dei sju åra han har hatt ordførarkjeda.
Bø er her den store vinnaren i Telemark.
– Så du sluttar ikkje fordi at det er noko som brenn under beina dine?
– Absolutt ikkje. Det var no eg hadde sjansen og dette blir stillinga mi fram til eg er pensjonist, avsluttar den 57 år gamle Bø-ordføraren. ▶ Halvor Ulvenes