Har nytt prosjekt
I Stasjonsvegen i Bø, rett ved jernbanen, er det planlagt eit nytt byggjeprosjekt til nærmare 80 millionar kroner.
Planen for det som har arbeidstittelen Grivitorget er 18 leilegheiter frå 50-100 kvadratmeter pluss næringslokale, for kontor og detaljhandel. Det stadfester dagleg leiar Kjell Aage Verpe i ITV Eiendomsutvikling over for Varden. ITV står bak planane saman med NorgesGruppen.
Han opplyser at søknad om ei omregulering er sendt til kommunen. Ifølgje Verpe har prosjektet ei takhøgd på 18 meter, for å få fram det arkitektoniske gamle låvepreget på bygget. Gjeldande reglar i Bø er 16 meter.
Byggestart til vinteren
– Me har ein positiv dialog med kommunen om saka, seier den aktive investoren. Han fortel at bygget har ei grunnflate på 700 kvadratmeter. Me satsar på at reguleringsplanen er ferdig godkjent i desember, og at spaden kan setjast i jorda i februar 2019. Det er kalkulert med ei byggjetid på kring eitt år, noko som betyr ferdigstilling vinter eller vår i 2020.
Bygget blir liggjande der som Nils Grivi tidlegare hadde kolonialbutikk. Dette bygget skal rivast, og så blir parkeringsplassen til den gamle forretninga også nytta ved utbygginga. Investorane har planlagt parkeringskjellar.
Verpe fortel at det er stor interesse for prosjektet, både når det gjeld private bustader og næringsdelen. Kontor/handel skal vere i dei to fyrste etasjane og medan bustadene ligg i toppetasjen.
– Det er framleis ein marknad for leilegheiter i Bø. I vårt prosjekt blir avstanden både til Bøsenteret og jernbanestasjonen svært kort. Foreldreutvalet for barn og unge, som skal flytte frå Oslo til Bø, er ein aktuelle leigetakar, opplyser investoren vidare.
På bustadsida blir det sam- arbeid - og Verpe nemner her Porsgrunn Boligbyggelag som ein mogleg partnar.
Ny kafé
I bygget er det elles lagt opp til felles resepsjon, auditorium for møte på Skype og kafé som og skal nyttast som kantine for tilsette. Kaféen blir tilgjengeleg for alle, får Varden opplyst.
– Noko som kan velte prosjektet?
– Me må gjennom dei ordinære prosessane med godkjenning, avsluttar dagleg leiar Kjell Aage Verpe.