Grov grus fyrst og spurde etterpå
POLITISK BETENT Varaordføraren påførte selskapet bot frå eigen kommune
▶ Eit grustak i Vrådal er blitt politisk betent. Entreprenøren, der bygdas varaordførar er anleggsleiar, har fått bot.
▶ – Hadde eg ikkje vore varaordførar, skulle eg kjempa meir mot bota, seier Tarjei Draugedal.
Bakteppet er at det vart teke ut masse frå grustaket ved Fiskebekk hyttefelt utan at alle formalitetar var i orden.
Enkelt sagt grov dei fyrst - og spurde om lov etterpå.
Det førte til at Skorve Entreprenør, der varaordførar Tarjei Draugedal (KrF) i Kviteseid er anleggsleiar, fekk ei bot på 25.000 kroner av Kviteseid kommune.
Grunneigar på Fiskebekk, Halvor Nordbø, fekk krav om ei bot på 12.500 kroner. Dei klaga og rådmannen foreslo å senke bøtene med 10.000 og 5.000 kroner, men dette vart avvist av fleirtalet i formannskapet.
Ville kjempa
Varaordførar Tarjei Draugedal er svaert kritisk til bota frå eigen kommune.
– Me gjorde ein feil som ikkje søkte på førehand. Viss eg ikkje hadde vore varaordførar, ville eg kjempa mykje meir mot bota som er betalt. Det som skjer er urimeleg. Det blir ei forfølging av Halvor Nordbø og forskjellsbehandling. Det er mange andre grustak i kommunen der ikkje alt er etter boka, seier Tarjei Draugedal.
Ifølgje sakspapira frå kommunen har berre eitt av 26 massetak alle formalitetar i orden.
Draugedal stadfester at han tidlegare har meldt seg ugild under sakshandsaminga. Han deltok under handsaminga i siste formannskapsmøte, men viser til at Skorve ikkje lenger har økonomisk interesse i det aktuelle grustaket ved Fiskebekk.
Var ikkje klar
Plansjef og sakshandsamar Sveinung Seljås orienterte i siste formannskapsmøte om den nye utviklinga i saka. Han karakteriserte den da som ei vanskeleg sak.
Tidlegare har Halvor Nordbø søkt om å få selje overskotet av massen i Fiskebekk på den frie marknaden.
Han skulle etter planen levere til g/s-vegen i Vrådal, men dispensasjonen frå kommunen kom så seint at Nordbø berre fekk levert ein liten del av avtalt kvantum.
Formannskapet gav løyve til sal av grusen vidare på den frie marknaden.
Politikarane trudde ut frå søknaden til Nordbø at grusen alt var ferdig produsert.
Etter ei sprenging 3. august i år kom det for dagen at det aktuelle kvantumet var fast fjell da søknaden blei skriven.
– Det springande punktet for formannskapet blir om politikarane der føler at dei er ført bak lyset. Nordbø har halde seg innanfor det godkjende totale kvantumet av masse, seier plansjef Sveinung Seljås i ein kommentar til Varden.
Formannskapet i Kviteseid skal drøfte saka på ny den 27. september.
Beklagar skrivefeil
Grunneigar Halvor Nordbø seier til Varden at det heile skuldast ein skrivefeil i søknaden.
– Det beklagar eg. Eg føler meg veldig urettferdig behandla av Kviteseid kommune, seier Halvor Nordbø som òg viser til at mange andre grustak i kommunen ikkje har papira i orden.
Johan Straand, som òg driv grustak i Vrådal, har bede Maskinentreprenørenes Forbund engasjere seg i saka. Forbundet kritiserer kommunen.
– Eg føler denne kritikken veldig urimeleg. Situasjonen i
Kviteseid er ikkje eineståande. Det kom nye reglar om godkjenning av uttak i 2009, med overgangsordning fram til 2015. Situasjonen er at sakshandsaminga i direktoratet, som skal godkjenne desse uttaka, tek fleire år. Det set kommunen i ein vanskeleg situasjon. Me kan ikkje stoppe alle uttaka som manglar godkjenning, seier Sveinung Seljeås.