Vil by på ei oppleving
Henrik Ibsen og bygde-Telemark er sentrale på arrangementet i Nes kyrkje sundag kveld.
▶ Gjennom både foredrag og musikalske innslag håpar aktørane at publikum skal få ei god og laererik oppleving.
Fiolinist Wiggo Dahl og hardingfelespelar Ottar Kåsa, båe busette i Bø, skal by på tonar etter Ole Bull og Myllarguten. Ibsen møtte Ole Bull og kanskje også Myllarguten.
Leiar i Ibsenforbundet, Georg Pøyhønen frå Skien, skal halde foredrag om Ibsen på det 90 minutt lange arrangementet. Det vert leia av Erik Gjestvang, Skiens-mannen som for få år sidan gav den enorme boksamlinga si til Vinje kommune.
Modellar frå Sauherad
Arrangør Ragnhild Hagen er overtydd om at den store diktaren blei inspirert av lokale skikkelsar i Sauherad da han skreiv 1. og 5. akt av «Peer Gynt» for vel 150 år sidan. Desse aktene blei til på øya Ischia i Italia. Ho viser til Ibsen-sitata: «Alt det jeg har skrevet er enten opplevd eller blitt meg fortalt» og vidare «Det at dikte er vaesentlig at se».
Ho trekkjer fram «Mads på moen» og «Aslak smed» som døme på slike modellar frå Sauherad.
Pionerarbeid
Erik Gjestvang seier på si side at Ibsen kan ha henta rollemodellar frå Sauherad.
– Det gjeld å vere rause her og ha lov til å stille spørsmål, seier Gjestvang.
Både han og Pøyhønen trekkjer fram Ragnhild Hagen som ein pioner i arbeidet med å grave fram meir stoff om Ibsen, der ho nok rokkar litt ved etablerte synet om den store diktaren.
Aktørane på kvelden i Nes kyrkje er opptekne av den europeiske kulturarven og korleis den har påverka oss.
– Typisk norsk, ikkje berre norsk, seier Erik Gjestvang som saman med Wiggo Dahl understrekar at den norske kulturen er påverka av impulsar utanfrå. Dei meiner dette er viktig å ha med seg i ei tid med aukande framandfrykt.
▶ Halvor Ulvenes