God grunn til å vere eplekjekk
OPPSVING – Me kan konkurrere med oljebransjen, seier sjefen i Telefrukt, Svein Børte
▶ Sjefen i Telefrukt, Svein Børte, har ikkje opplevd maken til økonomi i sine 40 år i naeringa.
▶ Om nokre år skal ei tredjedel av alle norske eple komme frå Gvarv.
– Me kan konkurrere med oljebransjen. Eg har ikkje opplevd maken i mine 40 år i bransjen. Det er god økonomi i alle produksjonane, seier dagleg leiar på Telefrukt, Svein Børte, til Varden.
Inntekt på 700.000 kroner
Børte seier at med god drift i ein morellhage på 10 dekar er det mogleg å klare ei skattbar inntekt på 600.000 - 700.000 kroner i året.
– Arbeidsmengda for ein slik produksjon er på same nivå som 600 dekar med korn, fortel Børte.
Han opplyser vidare at kostnadene ved planting og oppføring av såkall tunnel for ti dekar vil liggje på 1,2-1,5 millionar kroner.
– Eg har opplevd at nokon har dekt desse kostnadene året etter, seier Børte.
Fått sving på produksjonen
I år har produsentane i Telemark levert 140 tonn med morellar, noe som er ny rekord. Den varme sommaren har vore ideell.
– I utgangspunktet blir morellar dyrka i ørkenliknande område. Med tunnelane her så er produsentane våre blitt lite avhengige av vêret. Alle har vatning, der dei samstundes tilfører gjødsel. I vår bransje bør det ikkje vere behov for avlingsskade, opplyser Telefrukt-sjefen.
Han meiner områda rundt Nesodden og Liheia i Bø er ideelle for slik fruktproduksjon. Han trekkjer elles fram produksjonsrådgjevar Jop Westplate ved Norsk Landbruksrådgjeving Østafjells og fruktkonsulent Jan Meland ved Midt-Telemark Landbrukskontor som ei viktig forklaring på suksessen.
Godt år
Også for plommer har det vore eit bra år. Dei 10-12 produsentane har levert 200 tonn i klasse I - som er det nest beste året. I fjor var det eit kronår med 250 tonn. Børte meiner potensialet ligg på 250-300 tonn.
På landsbasis er produksjonen om lag 1.500 tonn i året. I midtfylket starta produksjonen av plommer for kring ti år sidan.
– I år har det vore gunstige forhold med tørt klima. Utfordringa her i området er låge vintertemperaturar som resultat i større utgang av plommetre. Også i denne produksjonen gjer me bra pengar. No er det siste innspurten med haustinga. Kvaliteten i år er god og plommene har god smak, seier Svein Børte.