Vil auke med 50 prosent
I dag kjem kvart fjerde eple frå Gvarv. I løpet av tre-fire år er målet å auke produksjonen med 50 prosent.
– I år er produksjonen 2.000 tonn. Me satsar på å auke den til 3.000 tonn i løpet av 20212022. Det betyr at kvart tredje eple i landet vil kome frå Gvarv, opplyser dagleg leiar ved Telefrukt, Svein Børte.
Årsproduksjonen i Noreg ligg no på 7.000 - 8.000 tonn.
Omfattande nyplanting
I fjor blei det sett i jorda 110.000 nye epletre i midtfylket. I år er det planta 80.000 tre, og det er planlagt tilsvarande neste år. På eit dekar går det med 300 tre, slik at samla areal med nyplanting vil utgjere kring 900 dekar.
Kostnadene ved planting av eitt dekar med epletre ligg på om lag 60.000 kroner. Samla investering i epleplantinga utgjer såleis kring 54 mill.
– Det er små investeringar i denne naeringa samanlikna med husdyrproduksjon, seier Svein Børte.
Han fortel at innhaustinga er i gang og sortane Discovery og Summerred er ute i butikkane. Det er og hausting av Gravenstein og Åkerø. For vintersorten Rubinstep startar plukkinga i midten av september.
Telefrukt får inn eple frå 90 produsentar, og 85 av desse kjem frå Telemark.
Mange sysselsette
Telefrukt har ein fast stab på 5,5 årsverk. I tillegg kjem 40 personar på deltid.
Telefrukt omsette i 2017 for vel 72 millionar kroner og oppnådde eit resultat før skatt på tre millionar kroner. I løpet av 2018-2019 blir det investert for rundt 25 millionar kroner i to nye sorteringsliner pluss lager.
I same bygget held også dotterselskapet Telejuice til. Denne bedrifta omsette for kring 16 millionar i 2017. Der vart det underskot etter tøff konkurranse, men det unge selskapet satsar vidare. Med andre ord trilla det i fjor ut frukt og juice frå pakkeriet på Gvarv for naer 90 millionar kroner.