Ny evakuering i Arabygdi
Tre husstandar i Arabygdi i Rauland er igjen evakuert på grunn av rasfaren.
Dei åtte bebuarane flytta frå heimane sine måndag kveld.
– Det skjedde etter tilråding frå geologane våre. Alle husstandane har følgd tilrådinga, opplyser kraftverkssjef Hallgeir Kleiv i Statkraft til Varden.
Jobbar på spreng
Bebuarane fekk beskjed om at dei burde flytte seint måndag kveld.
– Statkraft byggjer no ein voll for å auke tryggleiken. Dette arbeidet er kalkulert å ta to til tre dagar. Viss arbeidet går etter planen, vil dei evakuerte såleis kunne flytte heim i løpet av veka, ifølgje kraftverkssjefen.
Møtte bebuarane
Måndag ettermiddag møtte han bebuarane, og Kleiv seier at det blei eit greitt møte.
– Eg kan ikkje svare på kva som blir gjort, men me ønskjer å få til ei varig løysing, seier Hallgeir Kleiv.
Aslak Kåsa, som bur i Arabygdi, blei evakuert frå laurdag til sundag, som tidlegare fortalt i Varden. Kåsa er ikkje berørt av den nye evakueringa. Han var med på møtet måndag kveld.
– Eg vil gje ros til Statkraft som står på, seier Kåsa.
Derimot er han svaert kritisk til den politiske leiinga i Vinje kommune.
– Dei burde vore med på møtet, men glimra med sitt fråver. Dette er veldig skuffande, seier Aslak Kåsa.
Lei seg
Ordførar Jon Rikard Kleven (Sp) seier til Varden at han er lei seg for at folk er skuffa.
– Eg vurderte det slik måndag - ut frå dei opplysningane eg hadde da - at det ikkje var nødvendig å dra på møtet. Det er mogleg det var feil, seier ordførar Jon Rikard Kleven til Varden.
Han var bortreist på laurdag og sundag, og valte i samråd med folk i kommunen ikkje å avlyse reisa.
– Eg er glad for at uhellet i Arabygdi ikkje skjedde i samband med ordinaer drift, men ved vedlikehald, avsluttar ordførar Jon Rikard Kleven.