– Kunne spart 14 mill.
Sjefen for Tveito Maskin, Hallgeir Lie, er opprørt over kommunale prioriteringar.
▶ Han viser til den betente leigeavtala som det interkommunale selskapet Irmat har inngått - med ein samla leigepris på 17 millionar kroner. Som tidlegare nemnd i Varden, er årleg leigepris der på 110.000 kroner per dekar, eller rundt 15 gonger høgare enn ei privat avtale i same området.
Veldig irriterende
– Irmat kunne kjøpt eit tilsvarande areal på naboområdet Brenna for tre millionar kroner. Dette området er eigd av det kommunale selskapet Midt-Telemark Naeringspark. Dermed kunne selskapet spart 14 millionar kroner. Ein treng ikkje høgare utdanning for å forstå galskapen i eit slikt økonomisk opplegg. I ei privat verksemd ville dei ansvarlege fått sparken, seier sjef og medeigar i Tveito Maskin i Lunde, Hallgeir Lie. Han bur på Gvarv. Lie understrekar at som skattebetalar er dette veldig irriterande.
– Eg har vore leiar av Gvarv idrettslag i 5-6 år og nestleiar i mange år før dette. Der fekk me avslag på både kunstgrasbane og ny hall. Kommunen hadde ikkje pengar. Dette går ut over dugnadsånda. Eg fryktar at folk vil gå lei i eit idrettslag som har hatt ei positiv utvikling, legg han til. Lie seier vidare at han ikkje kan tenkje seg at det er behov for dette anlegget, som han kallar eit prestisjeprosjekt.
– Søpla kan leverast andre stader. Kommunen treng nye innbyggjarar. Berre i siste utgåve av kyrkjelydsbladet Helsing var det ti døde og to døypte i same perioden. Eg trur ikkje eit slikt søppelanlegg er noko som tiltrekkjer seg nye innbyggjarar. Eg fattar ikkje prioriteringane, seier Lie.
Bra med ny skule
– Eigentleg passar heller ikkje søppelanlegget inn på Brenna. Lokalisering på kommunegrensa er malplassert. Det ville passa betre i området ved til dømes Hellestad Sandtak i Bø. Sidan politikarane har bestemt at anlegget skal liggje i området mellom Gvarv og Bø, ville lokaliseringa i Midt-Telemark Nae- ringspark blitt mykje billegare, ifølgje Lie.
Han seier at det må skapast verdiar for å få til ei bra utvikling.
– På den positive sida i kommunen vil eg trekkje fram at det blir bygd ny skule. Det er bra, avsluttar Hallgeir Lie. Styreleiar i Irmat, Helge Granlund, ønskjer ikkje å kommentere kritikken. Ordførar Mette Haugholt (Ap) i Sauherad forstår frustrasjonen, men seier at Irmat og idrettshall er to ulike saker. Ho seier at kommunen jobbar for å få til ny hall.
▶ Halvor Ulvenes