Utbygginga som kravde 23 liv
Ein dramatisk drukningstragedie, snøras samt klemog sprengingsulykker er baksida av medaljen ved den store kraftutbygginga i Tokke og Vinje.
Drukning, snøras, klemog sprengingsulykke kravde fleire liv då Tokkeanlegget blei bygd.
▶ Tokkeanlegget skapte enorme ringverknader både lokalt og nasjonalt. Fattige kommunar i vestfylket blei brått rike, og nasjonalt har utbygginga medført milliardinntekter.
Alt i 1986 var dei årlege inntektene for staten på 600 millionar kroner. Og det frå eit prosjekt som i utgangspunkta kosta ein milliard kroner – snakk om gullkanta investering.
På det meste var 1.200 personar sysselsett på Tokkeanlegget. Norsk ingeniørkunst blei verdskjent. Det var derfor stor festivitas da statsminister Einar Gerhardsen trykte på knappen og opna Tokke kraftverk 22. august 1961.
Baksida av medaljen
Men denne gylne medaljen har ei dyster bakside. Heile 23 personar omkom på ulikt vis under utbygginga av Tokkeanlegget som vara i 16 år – frå 1956–1972.
Ulykkene skjedde over ein periode på ti år – frå 23. mars 1956 til 21. april 1966. Gjennomsnittsalderen på ofra var i underkant av 40 år – den yngste var 15 år og den eldste 57 år.
Fyrste ulykka fann stad alt 23. mars 1956. 39 år gamle Thorleif Kåsa arbeidde den dagen på vegen mellom skyttarhuset på Dalen og den nye kraftstasjonen. Varden fortel på fyrstesida dagen etter at Kåsa stod i ein skråning da ein stein lausna og råka Kåsa. To legar kom til og Kåsa blei sendt til Fylkessjukehuset i Skien, men han døydde i sjukebilen ved Mostøyl i Høydalsmo.
Tre drukna
Den aller største tragedien fann stad på Songavatnet St. Hansdagen i 1961. Der gjekk tre menneskeliv tapt etter at ein båt tippa rundt. Norges Kristelige Student og Gymnasiastlag skulle ha dugnadsleir i samband med utbygginga. Planen var å rydde 2.000 dekar med skog og kratt langs strandlinene.
Leiren med 150 mann skulle starte sundag 25. juni, men ein fortropp på ti mann drog opp laurdag for å gjere førebuingar. Mellom desse var landssekretaer og pastor Arne With (43), syskenbarnet hans, Roger With (16), båe Oslo og Dag Erik Birkeli (15), sistnemnde frå Stavanger.
Kraftig vind
Dei tre karane frakta proviant i ein båt over vatnet – 150 liter mjølk, brød og ein del reiskap. Varden fortel 26. juni at båtturen truleg starta i 17-tida. Det var da sterk vind frå nordvest. Karane kom ikkje tilbake om laurdagskvelden, men dei sju andre som sat att i Bjørnsbu i Songadalen trudde dei hadde overnatta i ei brakke på andre sida av denne innsjøen.
Da dei tre karane ikkje hadde dukka opp i 12-tida sundag, byrja kameratane å ane uråd. Dei fann same ettermiddag båten velta 30 meter frå land på austsida av Songavatnet. Lensmannen i Vinje og Rauland vart varsla. Hjelpekorpsa i Vinje, Rauland og Rjukan deltok alle i aksjonen. Falken vart òg tilkalla, men fekk trøbbel med bilen og kom ikkje fram den dagen.
Sendt heim
Denne sundagen nytta det ikkje å leite på grunn av sterk vind. Helikopteret blei sendt heim av den grunn, og fyrst utpå ettermiddagen måndag 26. juni kunne dei sju båtane og 30 mann starte leitinga.
Ein froskemann fekk øydelagt eine trommehinna under dykking, og blei sendt til sjukehus.
Laurdag 1. juli 1961 melder Varden at tre froskemenn frå Falken har funne matvarene og alt utstyret dei sakna hadde med seg, kring 500 kilo.
Same dagen vart Roger With funnen på 12 meters djup. With låg 200 meter frå land og 600 meter frå der båten kantra. Lensmann Nordstoga trur den omkomne 16-åringen hang på båten eit stykke etter kantringa, men blei så utmatta at han måtte sleppe taket.
Funne seinare
Ei veke seinare blir dei to siste funne – 20 meter frå kvarandre og rundt 400 meter frå der fyrstemann låg. Rolf Framnes i Falken fortalde at truleg har også dei to andre henge i båten så lenge dei hadde krefter til å halde ut i det kalde vatnet.
Det er ikkje vanskeleg å førestille seg den desperate kampen som må ha funne stad ute på dette vatnet denne dystre sommardagen for meir enn 57 år sidan.
Sprengingsulykke
Sprengingsulykka på Venemo i Vinje torsdag 30. mai 1963 kravde også to menneskeliv. Anleggsarbeidar Nils Hønsi (46) år døydde momentant. Salva gjekk av for tidleg og han fekk steinsprut over seg. Anleggsarbeidar Kjetil K. Skogheim frå Grungedal vart sendt til Rjukan sjukehus, men døydde av skadane om morgonen 2. juli. Han hadde kone og fire barn i skulepliktig alder.
Toomkomiras
13. april 1964 vart også ein trist dag i soga om Tokkeanlegget. Fem menn vart tekne av ras, og to av desse omkom under snørydding på Venemodammen. To menn som stod midtvegs oppe i veggen flaut oppå snøen nedover, medan dei som stod i botnen fekk alt over seg. Ulykka skjedde klokka 16.15. Dei omkomne var Henry Vold (55) og Oluf Espe (49) som båe blei kvelte av den tettpakka snøen. Dei fekk eit par meter med tung og hard snø over seg. Vold hadde kone og eitt barn på fire år i Edland. Espe var ugift og opphavleg frå Vinstra.
Oppliving i tre timar
Arbeidskameratar fekk grave fram dei fem i løpet av eit kvarter. På fire av personane blei det utført munn- til munnmetoden. Distriktslegane Thiis frå Vinje og Guldal frå Rauland kom til stades, og dei jobba med livredding på dei omkomne i heile tre timar, før alt håp var ute.
Fyrste og siste
Dette var dei ulykkene som kravde fleire liv. Elles var det ei rad ulykker som kravde eitt menneskeliv. Den 21. april 1966 omkom 42 år gamle Ola Ottermo da han blei påkøyrt av ein borbukk. Dette er den sist registrerte dødsulykka på Tokkeanlegget.