Sentrumsplan for Bø
Det var eit splitta kommunestyre som vedtok sentrumsplan for Bø 10. september. Trass i samrøystes behandling av planen både i PTNutvalet (teknisk) og formannskapet, stemte både Arbeidarpartiet, Høgre og Frp mot.
Itillegg til politisk behandling, har planen vore på omfattand høyring, og alle har hatt høve til å uttale seg gjennom personlege samtaler, skriftlege innspel og folkemøte. Det er gjort greie for alle høyringsinnspel i saka som kommunestyret fekk til behandling og korleis dei er vurdert. I ettertid har det gått ein debatt der mange av debattantane ikkje synes å ha lese planen saerleg godt.
Senterpartiet var med å sikre fleirtalet fordi planen:
▶ Legg til rette for vekst i Bø.
▶ Gir eit konsentrert sentrum som sikrar korte gangavstandar og hindrar nedbygging av dyrka jord og anna verdifullt areal utanfor sentrumsgrensene.
▶ Tek trafikktryggleik på alvor.
▶ Legg til rette for både gåande, syklande og køyrande.
▶ Tek vare på historia.
Mindretalet i kommunestyret ville m.a. ha sykkelveg i Evjudalen i staden for i gata. Etter fleirtalet si mening ville det bety at ein i framtida får ei uheldig blanding av lokal biltrafikk, gjennomgangstrafikk og syklande i vegbanen i Bøgata. Vi meiner det er uakseptabelt både ut frå omsyn til trafikktryggleik og til trafikkflyt.
Etter vår meining er det nokre misforståingar ute og går. Planen legg ikkje opp til at:
▶ venstresvingfelta i gata skal bort.
▶ bussane skal ha kantstopp i staden for busslommer,
▶ det vil bli vanskeleg å bruke bil i sentrum,
▶ dei fleste skal sykle.
Planen legg til rette for meir bruk av sykkel. Samtidig skal sentrum ha kapasitet til å ta imot auka biltrafikk. Dei nye parkeringsnormene set både minimumskrav og maksimumskrav til parkeringsplassar ved utbygging. Gjennom meir effektiv utnytting og fleire plassar under bakken vil vi få ei god utnytting av det verdifulle arealet i sentrum. Kanskje må ein akseptere at ein ikkje utan vidare kan parkere så enkelt og greitt som nå. Det er prisen ein må betale for alle dei positive sidene ved det framtidige sentrumet i Bø.