Han fekk ny avtale
Den omstridde leigeavtala mellom Irmat og Jørn Pettersen er reforhandla.
▶ Den årlege leiga er redusert frå 910.000 kroner til 670.000 kroner, går det fram av ei pressemelding som selskapet sende ut onsdag føremiddag.
Konstruktive forhandlingar
Styreleiar Helge Granlund opplyser til Varden at det har vore konstruktive forhandlingar som har gått over to månader, og han er fornøgd med korleis motparten, Brenna Stasjon og eigar Jørn Pettersen, har handtert denne saka.
– Tida vil vise om situasjonen roar seg. Eg er takksam for at Pettersen har hatt ei svaert god og konstruktiv tilnaerming i forhandlingane, uttaler styreleiaren.
Meir i tråd med marknaden
– Leigeavtala er no langt meir i samsvar med det som følgjer av den eksterne verdivurderinga, skriv styreleiar Helge Granlund i pressemeldinga.
Han skriv vidare at styret har fått ei ekstern verdivurdering av leige av eigedomen, samt ei juridisk vurdering av om den førre avtala var lovleg. Den juridiske vurderinga vart gjennomført av advokatfirmaet Arntzen de Besche
– Var den førre leigeavtala ulovleg?
– Nei, det blir feil å seie, men den utfordra reglane om statsstøtte i EØS-avtala, svarar Helge Granlund.
Forlenga til 2050
Sist måndag vart det signert ei ny avtale. Leigeperioden er forlenga – fram til 2050.
Utleigar Jørn Pettersen seier at Helge Granlund har vore svaert profesjonell og ein fin kar å møte i forhandlingane.
– Ut over det viser eg til pressemeldinga, og har ingen andre kommentarar, seier Jørn Pettersen til Varden.
Snart bygging
I løpet av kort tid skal det investerast 13 millionar kroner i det nye avfallsanlegget på Brenna, på kommunegrensa mellom Bø og Sauherad. Anbodspapira er snart ferdige, og blir snart bli offentleggjort. Byggetida er kalkulert til eitt år.
Den opphavlege Irmat-avtala, med leigepris på 910.000 kroner i året, har skapt sterke reaksjonar i lokalmiljøet og mange oppslag her i Varden.
Neste etappe i denne saka er at kommunestyra i både Bø og Sauherad skal handsame revisjonsrapporten frå Telemark kommunerevisjon.