Namn på dugnad
I kommunen er det tidlegare registrert 9.360 stadnamn. No blir dei tilgjengelege for alle på data.
▶ Thor Wraa (1912-2007) gjorde eit unikt arbeid da han registrerte alle desse namna i Kviteseid i perioden 1970-1980, og merka dei nøyaktig av på flyfoto frå Widerøe. Da Wraa vart heidra for 15 år sidan, uttala Bottolv Helleland, leiar av seksjon for namnegransking ved Universitetet i Oslo, at samfunnet skulda Wraa fleire årsløner for den enorme innsatsen.
Fekk 200.000 kroner
Vest-Telemark Museum og Kviteseid Historielag gjekk så i bresjen for å gjere dette materialet tilgjengeleg på data. Dei søkte Språkrådet om midlar til denne digitaliseringa, og fekk maksimumsbeløpet på 200.000 kroner. Sidan har også Kviteseid Mållag meldt seg som samarbeidspartnar, blant anna for å bidra økonomisk.
Per Ormestøyl ved Vest-Telemark Museum er prosjektleiar. Han fortel til Varden at digitaliseringa starta i januar i år, og så langt er kring 1.700 namn lagt inn på data.
– Det er eit omfattande arbeid. Me har i dag 15 registratorar som jobbar på dugnad, men ønskjer oss fleire. Dette er ein bygdedugnad, og dei som melder seg kan sitje på data heime og få tilgang til eit spesielt registreringsprogram, seier Per Ormestøyl.
Sverre Bakken og Stein Larsen er svaert sentrale eldsjeler i digitaliseringa. Dei sit på Kviteseid Bibliotek kvar måndag og tysdag for å få stadig fleire namn inn i databasen.
Mange spesielle namn
Namnegruppa har sjølvsagt kome over mange spesielle og artige namn. Eitt av desse er «Mariskorte». Soga seier at ein militaer frå Lårdal kom i krangel med kona, og plasserte henne på ei skorte ved Straumane da dei var på veg til messe. Historia fortel ikkje noko om han tok frua med seg da han skulle heim att etter kyrkjebesøket.
Sorgenfri er knytt til ein stad ved Neset, der det var brennevinsproduksjon. Kjøparane tok seg ein stopp der, kanskje for å bli kvitt bekymringar - og namnet blei Sorgenfri. «Dårlaup» er namnet på ei kløft på seks-sju meter i Vrådal. Ein drapsmann skulle sleppe fri om han klarte å hoppe over. Mordaren gjorde det, men da han skulle «vise seg» ein gong til, gjekk det gale.
Ein åker i Kviteseid blei vigsla av presten, og fekk namnet «Vombar-Aaker», utan at lokalhistorikarane har klart å finne ut kva namnet betyr. «Drithol» og «Dritarodden» er svaert folkelege namn som neppe treng naermare forklaring. Halvor Ulvenes ▶