Loddet er kasta
Så er då region-reformen i boks. Utan å blande inn det brysame demokratiet. Det brysame «folket». Då er det best halde til bak attletne dører.
Stortinget er sett til sides fordi Stortinget har sagt sitt. Kan ikkje eit Storting gjera om på sine vedtak like godt som eit kommunestyre, dersom det er på ville vegar?
Bak dørene sat dei som liver etter slagordet: «vi allene vide». Og eg som trudde at det var noko einevaldskongane i «dansketida» hadde einerett på. For dei var heller ikkje «folket» meiningsberarar. Eg ser at ministeren lova ein masse arbeidsplassar ut frå sentralmakta, til dei nye regionane. Samtidig skal byråkratiet slankast. Me hev dei siste åra sett korleis det har gått med slankinga til dei blå-blå. Det siste er at det blir ca 100 nye arbeidsplassar.
Det blir spennande å sjå dette arbeidsplassrekneskapet etter kvort som lovnadane skal oppfyllast. Og ikkje minst kor arbeidplassane blir liggjande.
Den praktiske gjenomføringa er heller ikkje påbyrja. Trøndelagsfylka greidde det, takka vere eit grundig og skikkeleg førearbeid. Der hadde dei tydelegvis tenkt nøye gjennom konsekvensane og moglege snubletrådar.
Det er visst ikkje tilfelle i regionen Vestland. Hordaland krev å få eta dugleg av kraftinntektene i Sogn og Fjordane, sjølv om avtalen dei imellom seier noko om kor kraftpengane skal brukast. No ser det ut til at sume meiner at dette må avgjerast ved røysting – og alle veit kven som har fleirtalet då. No veit me, som bur i ein kraftkommune at noverande regjering er ute etter skatteinntektene frå kraftprodusjonen. Ministeren vil gjera den skatten statleg. «Vi allene vide». So skal ho dele ut til kommunane. Dermed gjer ho noko som aldri var i tankane på dei som let storsamfunnet nyttiggjera seg naturrerssursane i si tid. Dei rekna med varige inntekter. Ikkje over 60 eller 90 år, men for alltid. Og når finansministeren skal dela ut pengane, kor trur du dei hamnar? I alle fall ikkje i kraftkommunane. Dei ligg kje «der folk bor», må vita. Noko må nok au brukast til skattelette.
Dei kommunane som gjennom åra har bygt opp sine gode tilbod til innbyggjarane, og som truge har fylgt alle dei mange påbod og reformer som har komi. Desse kommunane som har greid seg godt, må no sjå etter stadar å kutte. Skule og helsetilbod er dei største postane. Treng vel ikkje seia meir.
Og regionreformen gjer ikkje dette betre. Tek ikkje staten burt inntektene, so er vel Vestfold like mykje i beit for skjeling som Hordaland.
Det var stor motstand mot samanslåinga i båe fylka og Senterpartiet har vori imot denne samanslåinga, men det har vori temmeleg stilt etter at KrF avgjorde saka. Og det tykkjer eg er synd. Det ser ut til at ein ikkje legg alt for stor vikt på at Telemark er meir enn Grenland.
Nomåde fylgje godt med, og ikkje gjeva for lang taum. Den avtala fylkesordførarane har skrivi under på, seier lite.
Folk i sentrale strok har ein spesiell tankegang om avstandar. Som døme kan eg fortelje at ordførarane no nyss, vart innkalla av Fylkesmannen i Tønsberg kl 0900 om morgonen til dialogmøte! Me er har røynsler med denne tankegangen her i Vest-Telemark. Det hende rett som de var at me blei kalla inn til møte i Skien kl 8-9 om morgonen, men når me skulle ha eit møte her oppe, var det uråd før i 10-11 tida.
So gamle Telemark Senterparti – pass på! Me i dette partiet skal tenkjer på dei stadane der det bur lite folk au. Dei er folk!