Vann pris for artiklar – no blir dei bok
Sidan 2015 har Varden-journalist Halvor Ulvenes gleda lesarane med sine lokalhistoriske artiklar. No slepp han 37 av dei i boka «Det hende i Telemark».
Laurdag sleppes den lokalhistoriske godbiten ut til folket. Med god hjelp av sambygding Halvor Kleppen og hans forlag er Halvor Ulvenes klar for lansering av boka som – slik boka si undertittel vitnar om – byr på historier om dåd og udåd i Telemark fortalt i Varden.
Får stor respons
Halvor Ulvenes signerte den første artikkelen i serien i Varden for tre og eit halvt år sidan. Opplaget på boka som no kjem ut, er på sju hundre eksemplar.
– Kva er erfaringane dine frå publikum etter meir enn tre år med «Ulvenes-historie» frå fylket naer kvar veke?
– Eg opplever at det har vore stor interesse. Eg får meir respons på desse artiklane enn når eg har eit hovudoppslag i avisa. Dette er gjennomgåande, seier ein takksam Ulvenes i ein prat med Varden.
Sjølv er journalisten Ulvenes svaert interessert i lokalhistorie så vel som forteljingar og folk. Kombinasjonen av desse og evna til å grave fram stoff har reda grunnen for artiklane som har gleda så mange – og no kan fortsette å gjere dette gjennom den nye boka. I arbeidet med artiklane har Ulvenes brukt mykje tid på å lese i bygdebøker, årsskrifter og bøker han låner på biblioteket.
– Så finn eg kanskje ei setning i ei bok og tenkjer: Oi, dette kan jo bli ein god sak. Det kan dreie seg om noko som er totalt gravlagt i ein femti til hundre år gammal artikkel, fortel Ulvenes som blei heidra med pris av Telemark journalistlag for artikkelserien i 2017.
Viktig å bevare for ettertida
Halvor Kleppen er glad for samarbeidet med namnebror Ulvenes og meiner det er viktig at dei lokalhistoriske artiklane kjem ut i bokform.
– Tenk kva desse artiklane betyr for interessa for lokalhistorie. Mange tusen les artiklane når dei kjem ut i Varden. I boka er dei samla for ettertida, seier Kleppen.
Ulvenes sit på meir enn seksti artiklar som ikkje fekk plass i «Det hende i Telemark».
– Kan det bli snakk om ei bok nummer to?
– Me får sjå. Me smiler og håper det beste, seier Halvor og Halvor.