Ingen jol utan Ragnar
Dugnadsånda har Ragnar Lurås teke med seg frå Edland. No er han klar med si 19. utgåve av «Jol i Telemark».
19. utgåve av «Jol i Telemark» er klart. Dugnadsånd har vore drivkrafta.
NRK-journalisten kom inn som medredaktør i 2000, og sidan blei han eineredaktør av det populaere som er trykt opp i eit opplag på 5.000.
Snudde økonomien
– Dette har vore eit dugnadsprosjekt, men i det siste er det blitt litt godtgjersle til redaktøren og honorar til bidragsytarane. Da eg kom inn, hadde bladet kassakreditt. I dag har me pengar på bok, seier Ragnar Lurås. – Kva er det som driv deg? – Eg liker friviljug innsats for organisasjonar. Dette ligg i meg frå oppveksten heime i Edland. Der er dugnadsånda god, seier den 63 år gamle redaktøren.
Det høyrer med at dugnadsjobben også har kosta han ein privatbil. Når han er ute med bladet rundt om i fylket, er det som regel snø i dei øvre bygder.
Bilen gjekk tapt
– Ein gong kom eg utfor vegen og utan kasko var bilen tapt. Så no har kona forlanga at eg må køyre i leigebil når eg er ute på desse turane med bladet mitt, seier den ivrige redaktøren med eit smil.
Telemark Mållag gjev ut «Jol i Telemark» som i år har 85 -årsjubileum. Ragnar har også vore leiar av den organisasjonen i fleire år.
Det nynorske språket har han med seg heimanfrå, og interessa vart styrkt ytterlegare da han skreiv om Aasmund Olavsson Vinje i ei historisk oppgåve på Journalisthøgskolen i Oslo.
Sidan har vinbyggjen, som no er busett i Skien, vore redaktør av Radio Ok i Oslo og Vest-Telemark Blad.
Snart kan han feire 20-årsjubileum som journalist i Telemarkssendinga.
Spennande stoff
Den røynde redaktøren byr på mange spennande soger. Hovudartikkelen i år er ført i pennen av Ingebjørg Lognvik Reinholdt. Ho skriv om Guro Heddelid og det dramatiske livet hennar på Heddelidgarden i Seljord. Artikkelen er illustrert av Johnny Andvik, som er blitt fast illustratør for «Jol i Telemark».
Anders Kvåle Rue fortel om portalane i Heddal stavkyrkje, Kari Smeland byr på ei novelle medan Kjell Bitustøyl skriv om reingjetaren Arne Nordgarden, for å nemne eit lite utval av dei mange spennande artiklane i årets utgåve.