Komet blei heidra Per Anders til topps
Kometen Simen Roheim Iversen blei heidra med minnepris, og Per Anders Buen Garnås vann hardingfele klasse A under Bøkappleiken.
24 år gamle Roheim Iversen blei laurdag ettermiddag overrekt Heidi Løvlunds minnepris på 10.000 kroner pluss diplom. Utdelinga skjedde i samband med den årlege Bøkappleiken.
Bøheringen, som no studerer på Universitetet i Rauland, er eit stort talent i folkemusikk. I fjor vann han seniorklassa i munnharpe. Simen lagar også munnharper på verkstaden til Universitetet i Søraust-Noreg, der han skal ta bachelor på metallina.
Fekk spesiell julegåve
Opptakten til prisen er julegåva som Simen fekk av pappa Per Tore Iversen i 2014. Julepresangen var eit kurs i munnharpe hjå sambygdingen Anders Røine.
Simen hadde tidlegare ikkje noko spesielt forhold til folkemusikk, men gåva frå faren tente verkeleg gnisten hjå 24-åringen som har lyst å satse vidare både med produksjon og speling.
Nervøs på scena
– Eg er fascinert av slåttespel, men føler meg ikkje så komfortabel med å stå på scena, seier bøheringen.
– Men du vann jo Landskappleiken ....
– Ja, men da var det rikeleg med nervar, seier folkemusikaren som naermast har hatt ei lynkarriere.
Han synest prisen sjølvsagt er stas, og takka så mykje for prisen etter utdelinga på ungdomshuset Sandvin i Bø. Publikum kvitterte med solide klappsalver til den populaere vinnaren.
Til topps
Per Anders Buen Garnås, som vann landskappleiken i sommar, tok ein ny siger i hardingfele klasse A med 93 poeng, eitt poeng før Torgeir Straand. Ottar Kåsa følgde på tredjeplass med 91 poeng, så det var jamt i teten. Åsmund Fauske Jøtun frå Gol vann B-klassa i hardingfele med 76 poeng, fire poeng før Birgit Haukås Tinn. Ånond Versto frå Seljord Folkemusikklag kom på tredjeplass. Eivind Knutsen frå Setesdal var suveren i C-klassa hardingfele, 19 poeng før Elisabeth Østensen frå Seljord med 54 poeng. Sunniva Langås-Røiland kom på tredjeplass med 51 poeng.
Ingebjørg Bø og Eivind Bakka var einaste par i dans klasse A med 81 poeng. Marianne Tvitekkja med følgje frå Tinn vann B-klassa i dans, med 77 poeng, eitt poeng før sambygdingane Birgit Haukås og Knut Boksasp Berge.
Gjertrud Raftevold Rue med følgje toppa C-klassa i dans. Knut Boksasp Berge vann halling klasse C, for å nemne nokre av resultata.