Kvifor så få telemarkingar i NM?
Dersom Telemark fortsatt hadde hatt dei tre skikrinsane Aust-Telemark, Grenland og Vest-Telemark, ville det kunne vore fleire deltakarar frå Telemark i NM på ski, fordi kvar skikrins har ei kvote å sende.
Fordi om fylket har alt for få toppløparar, ville vi i alle fall vore betre representert i NM. Det er betre å vera med utan topplasseringar enn ikkje å vera med i det heile. Vi kan ikkje organisere oss til å få betre idrettsutøvarar. Sjølv om organisasjonen blir meir effektiv, blir rekrutteringa det motsatte. Det er i lokalmiljøa eldsjelene og den nødvendige patriotismen og drivkrafta fins for å få fram gode skiløparar. Da må organisasjonsstrukturen tilpasse seg dette og ikkje omvendt.
Det har gått tilbake med skisporten heile tida i fylket, fyrst ved samanslåinga av dei tre skikrinsane i Telemark, og ikkje minst ved samanslåinga med Vestfold. Da er tida inne til å spørje seg om ein har organisert seg bort frå å få fram dei gode aktive utøvarane frå lokalmiljøa. Det nye «Team Telemark» vil forhåpentlegvis vera ei motvekt mot dette, serleg nå når Steinar Mundal har kome inn som ein erfaren og framragande trenar.
Kanskje ein ide i tillegg kunne vera å få til ei eiga skigymnasavdeling ved Kvitsund Gymnas i Kviteseid, som i dag er ein internatskule med fritt elevinntak, og lokalisert mellom turistbygda Vrådal med skiløyper og skitradisjonsbygda Morgedal med stabile snøforhold ikkje langt frå den flotte skiarenaen i Høydalsmo.
Det har vore planar om å få til ei friluftslivline ved Kvitsund. Kanskje friluftsliv og skiidrett til ei viss grad kunne kombinerast i denne utdanninga både i teori og ikkje minst i praksis.
Jon Ingebretsen