Dramaet etter at Märtha tente OL-elden
Tidlegare OLpresident Gerhard Heiberg truga med marinen, men elden frå Morgedal brann aldri under dei olympiske leikene på Lillehammer.
Det var skikkeleg drama rundt elden etter tenninga i Morgedal laurdag 27. november 1993. Bråket starta nokre veker etter festen i telemarksbygda. Det stadfester tidlegare OL-president og aeresmedlem i IOC, Gerhard Heiberg, over for Varden.
Støtta Morgedal
Elden frå Morgedal var på veg mot Lillehammer, og visjonen var at den skulle smelte saman med den greske elden. Heiberg viser til at OL-elden kom frå Morgedal både då det blei arrangert OL i 1952 og i 1960.
OL-presidenten visste da lite om kva for storkonflikt dette skulle utløyse med grekarane. Dei hegna om si eiga flamme og hadde ikkje noko ønske om å blande den med det dei meinte var eit framandelement frå Morgedal.
– Dei to flammane smelta aldri saman på Lillehammer, seier Heiberg.
Elden frå Morgedal brann på torget inntil den greske kom til byen. Morgedal-elden blei teke vare på, og brann for Paralympics så lenge det arrangementet varte.
Truga med krigsskip
Grekarane stilte ultimatum om at berre den greske elden skulle brenne på Lillehammer, og Heiberg vart mildt sagt sint.
– Eg truga dei med den norske marine og sa at me i så fall ville hente den greske elden og bestemme korleis det skulle gjerast, fortel Heiberg.
Han opplyser vidare at daverande kulturminister Åse Kleveland roa han ned med desse orda: «Gerhard, nu er det nok». Kleveland meinte at kampen ikkje var viktig nok.
Andre interesser
I boka «Et eventyr blir til. Veien til Lillehammer» skriv tidlegare OL-president Heiberg at andre forhold enn olympiske ideal og samansmelting av flammar stod på spel. Grekarane sat med formannskapet i EU, der Noreg søkte om medlemskap på den tida.
Heiberg seier at grekarane ikkje har gløymt dette dramaet.
– Dei smiler litt tafatt når eg møter dei, seier den tidlegare OL-presidenten.
Han kjem på feiringa av 25-årsjubileet for fakkelstafetten som går av stabelen i Morgedal sundag 25. november.
Eigen song
Der er det lagt opp til stor feiring med føredrag både av Heiberg og skihistorikar Halvor Kleppen. Martin Listaul band, som har laga ein eigen Morgedal-song, opptrer. Vidare blir det vising av både Morgedalskufta og skitrone.
Det skjer etter at Norsk Skimuseum, representert ved styreleiar Aslak Slettemeås og dagleg leiar Kristi Marie Tveit, har ønskt velkomen. Feiringa er flytta til grendehuset i Morgedal, fordi arrangøren ventar mykje folk.
Ein praktdag
Morgedølane har mykje å feire, for tenninga av OL-elden blei ein praktdag. Da tyrifakkelen byrja å brenne i den gamle husmannsstova på Øverbø, var det ikkje berre ein historisk augneblink. Det blei også telemarksreklame på sitt aller beste.
Varden skriv i eit stort oppslag måndag 29. november 1993 at stemninga var rett og slett eventyrleg. Det var sol frå knallblå himmel, snødekte grantre og 4.000 – 5.000 begeistra tilskodarar. Skikkeleg holmenkollstemning på arenaen i bygda, der vogga stod for den moderne skisport.
Dette skapte eit yrande folkeliv med toradarmusikk, salsbuer og eit stilig publikum med flagg.
Morgedølar seier at aldri har bygda vore finare.
– Eg hugsar tenninga godt. Det var stemmingsfullt og eg har mange gode minne frå den tida, seier Gerhard Heiberg som fekk ei ekstra stor stjerne i Morgedal etter den dramatiske vinteren for 25 år sidan.
KJELDER: Gerhard Heiberg: Et eventyr blir til. Veien til Lillehammer, 1995. Samtale med Gerhard Heiberg, Varden 29. november 1993