Klar med kongebok
Den tidlegare Skiensmannen er klar med ny kongebok. Han fekk ideen av dronning Sonja.
▶ «Sangerprinsen» er namnet på boka om sjarmøren hjå Bernadottene, prins Gustaf, som døydde berre 25 år gamal.
Boka blir lansert på Litteraturhuset i Oslo fyrstkomande tysdag. Odd Inge Skjaevesland, oppvaksen i Skien, er forfattar. 61-åringen har lang fartstid som journalist i Aftenposten.
Sonja tente gnisten
Det var etter lanseringa av boka hans «Ministerhotellet» i 2005 , om den svensk-norske unionen, og dei fyrste statsministrane i Noreg, at Skjaevesland fekk ideen. Det var dronning Sonja som tente gnisten da han møtte dei to landa sine kongepar og tronarvingar i samband med eit arrangement i Stockholm seinare på hausten i 2005.
– Dronninga trekte fram «sangerprinsen Gustaf» og avslørte at ho som ei av få kjende til mannen. Gustaf lèt etter seg over 50 musikkstykke, av ganske god kvalitet, fortel forfattaren.
To gonger i Telemark
I boka fortel Skjaevesland at prins Gustaf (1827-1852) var to gonger i Telemark - i 1845 og 1849. Under fyrste besøket som blei gjennomført for at kongefamilien skulle treffe fleire nordmenn enn dei frå det øvre lag i Christiania - gjekk turen til Kongsberg. Der hadde dei omvising i blant anna sølvverket og våpenfabrikken. Frå Kongsberg reiste dei fyrst med hest og små vogner, deretter på hesteryggen over Luksefjell til ein jaktstad som Løvenskiold eigde. Dei blei rodd over fjellvatnet, før hest og vogner frakta kongefamilien til Fossum.
– Her regjerte den omstridde statthaldaren Severin Løvenskiold som blei undervurdert av ettertida. Gustaf og hans familie besøkte også Skien fire år seinare. Viss Gustaf hadde fått ei normal livslengd, ville ikkje Oscar II blitt konge. Eg trur likevel unionen ville blitt oppløyst, men kanskje ikkje i 1905. Me hadde heller neppe flagga 7. juni til minne om vedtaket i Stortinget om å løyse opp unionen, avsluttar Odd Inge Skjaevesland.
▶ Halvor Ulvenes