– Mykje verre enn eg trudde
Utan tilførsel av ny kapital vil Gullbring Kulturanlegg om kort tid ikkje vere i stand til å betale verken rekningar eller avdrag til banken.
Det er full økonomisk krise i det kommunale selskapet Gullbring Kulturanlegg. – Situasjonen er mykje verre enn eg trudde, seier ny styreleiar Terje Wold.
– Situasjonen er mykje verre enn eg trudde. Me får ikkje lånt ei krone til i banken og blir heller ikkje innvilga kassakreditt utan kommunal garanti. Etter 25 år har selskapet framleis 40 millionar kroner i gjeld, seier nyvalt styreleiar Terje Wold, som har hatt vervet i berre halvannan månad.
I går hadde han og konstituert dagleg leiar Katharina Berg Skomedal møte med Bø formannskap. der fekk politikarane klar beskjed om den dystre økonomiske situasjonen. Wold seier at selskapet er i full krise.
– Ved inngangen til 2018 var den negative eigenkapitalen på naer seks millionar kroner. I inneverande år vil underskotet bli minst ein million kroner. det betyr at underbalanse ved årsskiftet vil vere på sju millionar kroner, seier Terje Wold.
Kommunen løyver i dag to millionar kroner årleg til kulturanlegget. Ordførar Borgar Kaasa (Sp) opplyste i møtet at for 25 år sidan var beløpet tre millionar kroner. Korrigert for konsumprisindeksen er dette beløpet om lag 4,8 millionar kroner no.
Lite nytt
Kommunestyret har bestilla ein ny konsulentrapport til 300.000 kroner for å få ein gjennomgang av selskapet. Rapporten skulle vere klar til 16. oktober, men låg framleis ikkje på bordet under eigarmøtet mellom Gullbring og formannskapet måndag.
– Det kom ein førebels rapport 1. oktober. der var det lite nytt, seier Terje Wold i sin kommentar til Varden.
Bortkasta
Høgres Asbjørn Botnen var svaert kritisk til pengebruken på denne rapporten under møtet måndag.
– Me treng ikkje rapporten. No må tiltak til - elles må anlegget stengast, sa Høgre-mannen. Dei andre i formannskapet meiner rapporten er nødvendig.
I møtet kom det fram at subsidierte leigeprisar og billettar til ulike grupper blir eit tema framover.
Garanterer
Rådmann Åse Egeland fekk fullmakt til å lage ei innstilling om kommunal garanti for kassakreditt. Den saka kjem til handsaming i formannskapet måndag 26. november