Mållag med nytt skrift
Nissedal mållag er ute med eit nytt årsskrift med svaert variert innhald.
Boka inneheld både glimt frå kvardagslivet og tragediar. Årets utgåve er nr. 14 i rekka, og kjem i eit opplag på 500 eksemplar.
Flykollisjonen
Ein av artiklane i år omhandlar flytragedien ved Onstad den 15. mars 1974 da kaptein Elling Weme Nilsen (30) frå Halden omkom. To fly frå Rygge flystasjon kolliderte.
Den 26 år gamle løytnanten Tor Saeter frå Bergen klarte å skyte seg. Major og presseoffiser Gunnar Gulbrandsen fortalde til avisene at det ikkje var fyrste gongen dei to flygarane var på øvingstur saman. I boka, ført i pennen av Tor Valle, er det sitert fleire augevitne som såg det som skjedde denne gongen. Desse er henta frå avisoppslaga etter ulykka.
Eitt av fleire hyggjelege innslag i boka er artikkelen frå Anne Margrethe Espelid. Ho fortel om at «Topptur Nissedal» har fått sin eigen genser. Toppturane er eit samarbeidsprosjekt mellom kommunen ved folkehelseog frisklivgruppa, Nissedal frivilligsentral samt lokale idrettslag og turgrupper.
Skriftet har elles ei rad artiklar, og er på totalt over 163 sider.
Heile kommunen
I føreordet frå skriftstyret heiter det at ein har hatt som mål å få med minne og hendingar frå alle delar av Nissedal kommune.
– I ein liten kommune er det mykje som bind oss saman i fortid og notid. Ikkje minst har me godt av å bli minte om at me ikkje skal så svaert langt attende for å møte slit og sveitte og harde tak i lange arbeidsdagar både for kvinner og menn, skriv skriftstyret.
Mange foto
– Også i år er det gledeleg å få syne fram mykje godt frå kulturlivet i kommunen vår: gamle fotografi, nyare foto, skriving i poesi og prosa, idrettsliv og kyrkjeliv og mannekengar i flunkande nye «toppturgenserar», ifølgje skriftstyret i Nissedal mållag.