«Null tillit til Irmat»
– Irmat har null tillit blant innbyggjarane. Det er bodskapen frå Asbjørn Botnen (H) og Glenn Isaksen (Ap).
▶ Dei kom båe med saftig kritikk av Irmat i Bø formannskap måndag. Politikarane der hadde måndag eigarmøte med styreleiar i Irmat, Helge Granlund. I den opne delen av møtet peika fleire politikarar på at det er viktig å byggje tillit, før dei stengde møtet i ein halv time for å snakke om «personsensitive forhold».
Dyr leigeavtale
Asbjørn Botnen sa at selskapet Irmat har null tillit ute i bygda, og Isaksen støtta dette. Som kjend inngjekk Irmat ei leigeavtale for ny avfallsstasjon på Gvarv. Leiga var 15 gonger høgare enn ei privat avtale i området. Leiga, som skapte mykje kritikk både i og utanfor det politiske systemet, er no redusert frå 910.000 til 670.000 kroner i året.
Vil ta mange år
– Selskapet har eit vanvitig problem med tilliten. Det som selskapet har rive ned, vil det ta fleire år å byggje opp. Alle prosessar må stoppast inntil granskinga er klar, seier Glenn Isaksen i ein kommentar til Varden etter møtet var over.
– Det er vond lukt av heile Irmat-saka. Den dreier seg om lommeboka til innbyggjarane, sa Ap-representanten som regelrett «grilla» Helge Granlund om ulike forhold i selskapet.
Opptek mange
Høgres Asbjørn Botnen peika på at saka opptek veldig mange av innbyggjarane.
– «Hemmelege ting» styrkar ikkje tilliten. Eigentleg skulle kommunen trekt seg ut av heile prosjektet. Det har skjedd forhold som er veldig uheldig for selskapet. Du som styreleiar kan ikkje ha det godt. Sjølv ville eg gått av. Det er ikkje mykje tillit til Irmat. Det eg seier no er folkemeininga, sa Botnen da han vende seg til Helge Granlund.
Botnen karakteriserte også utskiftinga av partifelle Wenche Akkerhaugen i styret som eit kupp. Han stilte spørsmål ved kva som skal til for å skape ro i selskapet.
Går vidare
Styreleiar Helge Granlund orienterte både om si eiga rolle, historia og framtida.
– Miljøstasjonen på Gvarv blir bygd. Behovet er der, sa Helge Granlund til politikarane.
Granlund seier til Varden at det blei eit greitt møte.
– Ut over dette ønskjer eg ikkje å gje nokon kommentar, seier styreleiar i Irmat, Helge Granlund.
▶ Halvor Ulvenes