– Gullbring er ei bombe
Kriseramma Gullbring Kulturanlegg får kommunal garanti for kassakreditt på 1,5 millionar kroner. Politikarane utsette andre tiltak til over nyttår.
Føresetnaden for vedtaket, er at Fylkesmannen i Telemark godkjenner den kommunale garantien. Saka blei handsama etter den såkalla hasteparagrafen.
Som fortalt i fleire oppslag i Varden sist veke, er kulturanlegget så blakk at dei snart ikkje vil vere i stand til å betale rekningar og avdrag på lån. Det kommunale selskapet får ikkje låne ei krone i banken utan garanti.
–Gullbring er ei udetonert bombe. Med garantien i dag aukar gjelda og situasjonen blir ytterlegare forverra, sa Asbjørn Botnen (H) da formannskapet handsama saka måndag. Botnen meiner selskapet vil gå rett vest viss det ikkje skjer noko.
Snart 25 år
Bø kommune har eit totalt garantiansvar på 95,4 millionar kroner, og av dette er 25,4 millionar kroner knytt til tre lån til Gullbring Kulturanlegg. Det går fram av utgreiinga til rådmann Åse Egeland.
Det økonomiske forholdet mellom Bø kommune og Gullbring Kulturanlegg vart regulert av ei avtale frå 1994. Det var dette året storstova i Bø vart offisielt opna. Dei tinglyste avtalene blei reforhandla i 2014.
Slik er husleiga
Den nye avtala seier at kommunen betalar 3,6 millionar kroner i husleige pluss moms for inneverande år. I tillegg er det regulert tilskot til allmenne føremål på 750.000 kroner. I år får dessutan Gullbring eit ekstra tilskot på 1,25 millionar kroner, for blant anna å dekkje delar av utgiftene til det auka låneopptaket på ti millionar kroner.
Det faste, årlege tilskotet frå Bø kommune er på to millionar kroner. Gullbring Kulturanlegg hadde ved inngangen til 2018 ei samla gjeld på 45,4 millionar kroner, og ein negativ eigenkapital på kring 5,6 millionar kroner.