Gripende møte med livredderne
Gledestårene trilla da Sigmund Valhovd (82) møtte fire av personane som redda livet hans i sommar.
▶ Sigmund Valhovd (82) rekker fram hånda og takker Hanne Thorstein Gjedrum og Karianne Riiser for livet. Kvinnene er to av i alt sju personer som med sin innsats reddet livet hans da han druknet Seljordsvatnet i sommer.
Han drukna i Seljordsvatnet 6. juli i år, mens seks turistar og ein fastlege tro til og berga livet til 82-åringen på den dramatiske fredagen.
Fantastisk gjensyn
Nyleg møtte Sigmund Valhovd fire av dei sju livreddarane for fyrste gong etter drukningsulykka.
– Takk for livet, sa Sigmund som hadde med seg ein blomsterbukett til kvar av livreddarane. Han synest det var fantastisk å møte hjelparane, som han ikkje kjende namna på før møtet blei arrangert.
– Godt å sjå deg. Mykje hyggjelegare enn i sommar. Ein veldig rar følelse, for me trudde ikkje du ville overleve. Eg sa på førehand i dag at skulle eg møte ein død mann, fortel Hanne Thorstein Gjerdrum. Ho felte mange gledestårer under det gripande møtet i Sandefjord.
Hanne sat i ein ring ute i vatnet og koste seg med dei fem andre vennene da det plutseleg flaut ein mann i vatnet med andletet ned. Han var berre 30-40 centimeter unna da ho snudde seg. I løpet av kanskje 20 sekund fekk dei mannen på land.
Da ho og dei andre livreddarane tok han opp av vatnet på Bjørgesanden camping, var 82-åringen livlaus.
Veldig tungt
– Han verka veldig lang og det følast som han vog 150 kilo da me drog han opp. Me var heilt sikre på at han var død. Auga var kvite og leppene lyseblå, fortel to av dei andre, Thomas Riiser og Ingunn Valset.
Karianne Riiser fekk ringt AMK-sentralen og skreik ut på stranda om det var helsepersonell til stades. Dei sette i gang med gjenoppliving. Turistane såg da på dette som nesten nyttelaust, ut frå tilstanden.
Ein fastlege, som var på stranda, høyrde ropa og kom til.
– Da legen sette i gang med gjenoppliving, blei det ein heilt annan lyd i Sigmund. Ho gjekk meir brutalt til verks, og fekk puls i han. Utan fastlegen ville ikkje Sigmund levd i dag. Det gjekk nok godt over fem-seks minutt frå me fekk han opp og til var det var liv i han, seier dei
fire hjelparane frå Askim og Sandefjord som hugsar veldig godt jubelen da pulsen slo igjen.
Sigmund vart sendt vidare med ambulanse til sjukehuset i Skien.
Ekteparet Ronny og Kathrine Neegaard var også med på redningsaksjonen, men paret frå Askim hadde ikkje høve til å møte Sigmund Valhovd denne kvelden.
På festival
Dei seks turistane var på den årlege Seljordfestivalen. Det var glovarmt denne fredagen, og derfor reiste dei til Bjørgesanden for å kjøle seg litt ned.
Etter dramaet fekk dei tilbod om krisehjelp av Seljord kommune.
– Me bearbeidde hendinga ved å snakke saman om det som hadde skjedd, seier livreddarane.
Karianne Riiser seier at viss badeulykka hadde enda med dødsfall, trur ho ikkje at ho ville klart å ta turen til Seljord og festivalen neste sommar. No er livreddarane klare til å ta turen til dansebandfestivalen og bading på Bjørgesanden.
Sigmund Valhovd seier at han er ikkje framand for å ta seg ein ny badetur, og at det da kan bli eit langt meir triveleg møte med menneska som redda livet hans.
– Da skal eg halde meg naermare land, avsluttar den sindige seljordingen med eit smil.