Sjeldan hyttegjest
Midt på natta dukka den sjeldne hyttegjesten opp i Tuddal.
▶ TUDDAL/BERGEN
– Eg var oppe i 03-tida i starten av førre veke. Da høyrde eg bråk utanfor hytta, og kikka ut. Der stod fjellreven og åt av suppekjelen som stod til avkjøling. Eg tenkte ikkje over at det kunne kome dyr på besøk, seier Bø-kvinna Toril Falkevik som har hytta i Landsverklia under Gaustaråen i Tuddal.
Kom tilbake
Det høyrer med at reven kom tilbake til hytta hennar fleire gonger sist veke. Ho sjekka med leksikon og fann da ut at det var ein kvitrev som hadde vore på farten.
– Eg har snakka med folk i bygda, og dei seier at fjellrev ikkje er observert i Tuddal på 30 år, seier Toril Falkevik.
Ho synest sjølvsagt det sjeldne besøket er artig. Falkevik kunne ikkje sjå at reven var merka på noko vis da den var utanfor hytta.
Varden har sendt fleire av bileta som Falkevik tok til seniorforskar Arild Landa ved Norsk institutt for naturforsking (NINA).
– Det er ingen tvil om at dette er ein fjellrev. Eg er også rimeleg sikker på at den har eit merke i øyret, utan at eg kan stadfeste det heilt sikkert, seier Arild Landa.
Er naiv
– Det er alltid spennande med slike observasjonar. Reven som er sett i Tuddal må vera frå eit utsett dyr sidan den har øyremerkje, villfødde revekvalpar som er merkte får ikkje øyremerkje. Dette kan vera ein av dei som er sett ut i prosjektet. Fjellrev kan vandre utruleg langt. Me sette ut slike dyr på Varangerhalvøya, og den dukka opp igjen på Saltfjellet, seier seniorforskaren.
– Den kom tilbake til Tuddal? – Årsaka er nok at den fann mat. Kvitreven veldig naiv, i motsetnad til raudreven.
Så mange er sett ut
I løpet av dei seks - sju siste åra er det sett ut 123 revar på Hardangervidda - fordelt på Vinje, Eidfjord og Ullensvang. I Vinje blei dei sett ut i området nord for Songavatnet.
– Korleis er resultatet?
– Det har gått litt dårlegare med ynglingane på Hardangervidda enn til dømes på Finse og andre område der me har sett ut rev. Det har også vore ynglingar på Hardangervidda, sjølv om me ikkje har registrert det heilt store gjennombrotet der ennå. Der er det ein del raudrev, og den går ikkje godt saman med fjellreven. Raudreven kan ta fjellrev, men det er mest at den driv den ut av området. Dei liker ikkje å vere på same staden, seier Arild Landa som har leia Avlsprogrammet for fjellrev i Noreg sidan 2004.
▶ Halvor Ulvenes