Positivt at DNT vil satse
Vi er hytteeigarar i enden på Møsvatn og har utsikt direkte til Mogen turisthytte, og den nye hytta ser spennande ut.
Vi har vore knytt til denne delen av Møsstrond sidan 1950-talet, både gjennom familieband og seinare som hytteeigarar. Vi har i disse åra nytta turisthytta både som dagsgjester, men også til selskap med venner og familie. Turisthytta er etterkvart nedsliten og treng oppgradering til ein høgare standard.
Vi skal ikkje koma med lange utgreiingar angåande utforminga, men vi synast det ser spennande ut. DNT har sagt dei skal bevare noko av det gamle - og ikkje minst at det skal bli eit miljøbygg. At ein organisasjon vel å satse så store beløp inn i eit lite bygdesamfunn, må ein sjå på som positivt.
Det har kome framlegg om at DNT bør trekkje seg heilt ut av området/bygda. Nokon nyttar reinsdyr som argument. Dersom turistløypa ikkje lenger skal gå ned til Mogen, så vil det bli løype direkte mellom Lågaros og Stordalsbu. Det betyr at all turisttrafikk vil halde seg oppe på vidda, der reinen er, i staden for å trekkje turisttrafikken ned frå vidda til Mogen.
Erfaring syner at det er i mai og tidleg i juni at bukkeflokkar kjem frå aust og trekkjer ned i dalen. På den tida er det uframkommeleg nord i dalen, turisthytta er stengt og det er berre fastbuande i bygda. Turisthytta er elles berre open i påska vinterstid. Trafikken no er minimal i høve til 1960-70-talet , då det verkeleg var stor aktivitet og fullt heile påska.
Det er vel ikkje ein gard eller busetnad på Møsstrond som ikkje har noko innkomme av turisme. Anten av hyttefolk eller turistar, som er der for kortare eller lengre tid. Naering i form av hyttebygging, frakt av folk og utstyr sumar som vinter, vedsal, kulturformidling , utleige m.m. Og det fins vel knapt ein familie/gard på Møsstrond som ikkje har hatt eitt eller fleire familiemedlem som har arbeidd på Mogen eller på Fjellvåken. Turisme har vore og er ein viktig naering i bygda.
Vi synast etter kvart at diskusjonen om utforming av hytta dekkjer over det faktum at dette er eit viktig bidrag til framleis livsgrunnlag og busetting på Møsstrond.