Får kraftig smell
Kraftselskapa vil få fleire hundre tusen kroner i auka utgifter etter straumbrotet i midtfylket sundag. 3.000 abonnentar var utan elektrisitet i fleire timar.
▶ Heile Bø, Lunde og Gvarv blei ramma av straumstansen som skuldast mange trefall i den kraftige vinden.
Bø sentrum fekk igjen straumen etter vel seks timar medan andre delar av bygda var straumlause i elleve timar.
Største smellen
– Kraftselskapa vil få ei rekning på fleire hundre tusen kroner. Me kan førebels ikkje konkretisere beløpet naermare. I dette tilfellet er det Skagerak Nett som får den største kostnaden, opplyser adm. direktør Jon Arne Mørch Jonassen i Midt-Telemark Energi til Varden.
Når straumen uteblir, må selskapa betala kompensasjon for ikkje levert straum - på fagspråket kalla KILE-kostnader.
Veldig spesielt
MTE-sjefen opplyser at det byrja med fleire småfeil på føremiddagen, før den store smellen kom rundt klokka 14.10.
– Da fall det eit stort tre over Eika trafostasjon langs Lundevegen. Trefallet «kortslutta» heile anlegget. Eg har ikkje vore borti noko liknande her oppe tidlegare, så dette er veldig spesielt, fortel Jonassen vidare.
Ifølgje MTE-sjefen hadde kraftselskapet totalt 15 personar i sving for å utbetre feila og betene publikum som ringde inn.
– Det var så det koka på telefonen her. Eg forstår folk, så det er berre å beklage, men alle mannskapa gjorde sitt beste. Vinden blei målt opp i over 20 sekundmeter som er sterk storm. Det datt også eit tre over ein av bilane våre, så me måtte prioritere tryggleiken til mannskapa i den vanskelege situasjonen, seier MTE-sjefen.
Godt nett
Han seier at trefalla vil påføre Midt-Telemark Energi auka driftskostnader.
– No er det laga ein del provisoriske opplegg for at folk skulle få straumen raskt tilbake. Arbeidet med utbetringar vil ta fleire veker, seier Mørch Jonassen.
Han seier at MTE har eit godt linenett. Selskapet investerer kring 20 millionar kroner i året - av dette er åtte millionar til reinvestering og vel tre millionar kroner til nye liner.
▶ Halvor Ulvenes