Vil Erna og Siv avvise rettmessige erstatningar?
Eit såkalla ekspertutval - utnemnd av Siv Jensen, vil straffa kommunar som i årtider har levert rein kraft til heile landet.
Utvalet vel ta frå vassdragskommunar avtalte inntekter for store naturinngrep med neddemde landområde og tørrlagde elvar, og samstundes sjå bort frå den samfunnskontrakta som skulle gje varige inntekter - for nettopp varige naturinngrep.
Tidlegare stortingsrepresentant Ingvald Godal frå Høgre, nyleg gått bort, var oppteken av at kommunar som måtte ofre mykje av sin natur - skulle samarbeide og samle kunnskap om konsekvensar av reguleringane og stå samla i forsvaret av varige rettar som vart lova; før under og etter utbygging. Landssamanslutninga av vassdragskommunar (LVK) vart på det grunnlag etablert.
Siv Jensen demonstrerte sin forakt for distrikta ved å halde LVK utanfor sitt såkalla ekspertutval og på den måten hindre motforestillingar til einsidig økonomiske interesser målt frå Oslo, og på den måten overkøyre dei som for alltid må leva med ulempene som til dømes med Møsvatn som kan variere vasstanden med vel 18 m - og alle tørrlagde elvar rundt om i landet som er naudsynte for å skape vekst for storsamfunnet.
Den ulempeserstatninga vassdragskommunane vart tilkjent og som vart stadfesta av Stortinget – skulle koma direkte frå «verdikjeldene» les reguleringane - utan å bli dregen inn av staten for deretter gjennom byråkratiske ordningar bli dela ut att etter skiftande politisk innfall. Om dette skjer, må ein berre registrere at signala frå distrikts-noreg ved valet i haust ikkje ein gong er registrert av Erna og Siv, arrogansen rår og alt skal styrast frå Oslo med jernhand. Ein får berre vone at Venstre og KrF vil vise ansvar og ta omsyn til tidlegare inngåtte avtaler - der i prinsippet erstatnningar skal vare like lenge som ulempene med reguleringane varer.
Den uvissa dette skaper gjer nok heller ikkje bygging av vindkraft lettare å gjennomføre.