Klart for «årets» søtaste» i sitt slag
Sundag er det på nytt klart for Sjokoladekappleik i Bø – den 22. i rekka etter oppstarten i 1998.
Sjokoladekappleiken i Bø er den eldste i landet. Arrangørane i Bø juniorspelemannslag gler seg over at stadig nye generasjonar innan folkemusikken tek i bruk scena for dei yngste. Kring 70 folkemusikkspirer frå heile Telemark har dei siste åra vore med og deltatt i dans, kveding og spel på Sjokoladekappleiken.
Mange aktive utøvarar
– Her opptrer utøvarar frå barnehagealder til ungdomstrinn. Kappleiken er ei imponerande mønstring som år etter år viser at folkemusikken og folkedansen lever godt blant barn og unge i fylket, seier Gro B. Røiland som er leiar i Bø juniorspelemannslag.
Ho viser til at folkemusikken står sterkt i Sjokoladekappleiken sin heimkommune, Bø.
– I Bø finst mange aktive, unge hardingfelespelarar og folkedansarar. Med 17 barn og unge som spelar hardingfele i kulturskulen er listene fulle, og det har dei siste åra vore venteliste, opplyser Røiland.
Pris til inspirasjon
Sjokoladekappleiken blei opphavleg til etter ein idé av meisterspelemannen Anund Roheim. Arrangementet blei dratt i gang i 1998 av tidlegare leiar i Bø juniorspelemannslag, Sigrid Straand.
– Målet var å gje barn kappleikrøynsle og oppleve gleda ved å opptre, seier Gro B. Røiland.
Sjokoladekappleiken 2019 i Bø held hus på Bø ungdomsskule. Det vil bli delt ut inspirasjonspris til unge utøvarar innan spel og dans, får Varden opplyst. Andreas Soltvedt ▶