Søker om unntak fra forbod
Vinje kommune blir dagleg kontakta av rundt 100 personar som vil ha fritak frå forbodet om å dra på hytta.
Det er nasjonalt forbod om overnatting. I tillegg har Vinje innreiseforbod fram til 13. april, med unntak av innbyggjarar frå kommunane i øvre del av fylket.
Alle får nei
– Me blir kontakta både via telefon, e-post og på Facebook. Alle får nei, seier Kjell Christenson til Varden. Han arbeider på Tenestetorget i Vinje kommune, og er ein av dei som merkar det store trykket.
– Dette tek mykje tid, legg Christenson til.
– Kva bruka folk som argument for å kome på hytta?
– Det går mykje på at dei skal hente gjenstandar på hytta, stengje ned varmen osb.
– Det er også blitt nemnd at folk til dømes ønskjer å hente ein yndlingsgenser …
– Eg kjenner ikkje til at dette argumentet er blitt bruka, svarar Kjell Christenson på Tenestetorget i Vinje kommune.
Det har vore travle tider for dei tilsette på Tenestetorget.
– Dei har fått mykje kjeft, truslar om erstatningssøksmål mot seg personleg og no ein stygg trussel om våpenbruk, skreiv ordførar Jon Rikard Kleven på si Facebook-side torsdag. Han visar til ei hending der ein person truga med å kome til Vinje med ein sekk med våpen. Politiet blei varsla.
Ordførar Jon Rikard Kleven seier at han også har merka trykket.
– Ein hytteeigar sa at han hadde selt huset og ikkje hadde nokon stad å bu. Ein annan sa at leilegheita i byen var for liten. Så er det folk som skulle hente turklede, eller hadde ektefelle i ein samfunnskritisk funksjon. Tømme kjøleskåpet er eit anna argument. Alle hadde ein grunn da me sende ut den upopulaere meldinga om forbod, seier ordførar Jon Rikard Kleven.
Ordføraren opplyser elles at Rauland Vaktservice regelmessig sjekkar hyttefelta for innbrot.
– Dette er grunnen til at dei køyrer rundt. Vaktselskapet gjer ikkje det for å sjekke om folk er på hyttene sine, seier Jon Rikard Kleven. Over 700 hytter har fått tilsyn og svaert mange hyttetak er blitt måka.
Tredje påskedag
Vinje kommune forlenga nyleg innreiseforbodet fram til 13. april, det vil seie tredje påskedag.
Bakgrunnen er frykt for smitte, og at dei mange tusen hytteeigarane skal skape eit ekstra trykk på helsetilbodet under pandemien.