Kan bli et toppår for kornbøndene
Det kan bli eit gullår for kornbøndene i Telemark. – Vêret har så langt vore perfekt, seier Christian Ramberg på Uvdal i Bø.
Han synest åkrane med vårkorn ser heilt fenomenale ut.
– Det er sjeldan eg har sett så fine åkrar i heile kommunen vår som no. I år har nedbøren kome heilt som bestilt. Eg må likevel seie at ein kan ikkje selje skinnet før bjørnen er skoten. Me er også avhengig av gode forhold i innhaustinga, seier 36-åringen som har drive med slik produksjon sidan 2004.
Han tok over Uvdal i 2016, eigedomen som vert rekna som sjølve kongsgarden i bygda.
Har 1.000 dekar
Det er fredag ettermiddag, og den svaert dugande bonden ruslar i åkrane sine langt inne i Eikjabygda.
Uvdal har kring 300 dekar med dyrka mark, men han driv totalt tusen dekar ved å leige fleire bruk. Christian har i år 800 dekar med korn og 200 dekar med frø.
Av korn har han bygg, vårkveite, haustkveite og rugkveite. Sistnemnde blei sådd i haust og det er fyrste gongen han har dette slaget. Åkeren ser svaert flott ut.
– Det er moro når vêret har vore så bra heile vegen. Kornbøndene treng nokre slike år, for alle innsatsfaktorane i produksjonen blir dyrare, seier han, vel vitande om at også denne type produksjon er svaert vêravhengig.
Han meiner at den intense varmen no i juni ikkje slår negativt ut.
— Det er fuktig i jorda, så eg trur dette blir kjempebra. I år har det også vore lite angrep på kornet av både sopp og insekt, seier han.
Grei inntening
– Kva med lønnsemda?
– Den er grei, men det må vel vere lov å seie at innteninga på korn kunne vore betre, svarar bonden på Uvdal.
Han trur at innhaustinga av korn startar fyrste veka i august, medan treskinga av frø er kring tre veker unna.
– Blir det tid til ferie i år? – No er me stort sett ferdig med behandling av åkrane, så det blir litt fritid fram til treskinga, avsluttar Christian Ramberg.
Lange tradisjonar
36-åringen sit på ein gard som i alle fall har tradisjonar frå 1398. Da heitte bruket Updalum — og det tyder ein gard høgt (langt) oppe i dalen. I ulike år frå 1528 til 1665 er namnet skrive Opdall - i 1723 er skrivemåten Opdahl.
I Raudeboka frå 1398 blir Glør Arneson nemnd da ha gav to laup land av Uvdal til prestegjeldet i Bø. Arneson var ein kakse som eigde mykje jord både i Vestfold og midtre delar av Telemark. Kona hans Jorunn var frå Maela ved Skien, dotter av riksråd og sysselmann i Råbyggjelaget, Niklas Sveinsson Galle.