God utstillingsstart på Skinnarlandsamlinga
Rolf Nerli, opphavleg frå Siljan, er ein av utstillarane på Skinnarlandsamlinga i Rauland. Den fekk ein svaert god start sist veke.
Det var naermare 70 menneske på opninga og det blei selt 14 motiv fyrste dagen.
- Eg trur ikkje me har selt så mange bilete på opninga nokon gong, opplyser styreleiar for Skinnarlandsamlinga, Bodil Akselvoll, til Varden.
Stort spenn
Opningsprogrammet var ute i det praktfulle sommarvêret, med fine musikalske innslag av Silje Hegg og Torhild Ostad.
Kjell Bendiksen er den andre utstillaren i år. Han er representert med 39 motiv medan Nerli stiller ut 25. Båe kunstnarane var til stades på opninga torsdag kveld. Det er stort spenn i prisar på denne salsutstillinga - frå 1.500 kroner og til 24.000 kroner for eitt motiv.
Hytte i Rauland
Rolf Nerli, som blei fødd i Siljan i 1951, arbeider og bur i Tønsberg. Han har framleis kontakt med Telemark. Nerli har hytte på Farhovd i Rauland og sterk interesse for natur, folkekunst og folkedans. Han har sjølv gjeve uttrykk for at han hentar inspirasjon i fjellbygda.
Debuterte tidleg
Nerli er utdanna ved Statens kunst- og handverksskule i Oslo og Statens Kunstakademi. Han debuterte med separatutstilling i Kunstnarforbundet alt i 1980, og har sidan hatt ei rad utstillingar i inn- og utland. Nasjonalgalleriet, Riksgalleriet, Norsk Kulturråd og Stockholms lens kunstutstilling har kjøpt inn arbeida hans. I 2008 fekk han det prestisjefylle oppdraget med å lage diplomet til Nobels fredspris. På utstillinga i Rauland er han representert med 20 litografi og fem måleri.
Den andre
Kjell Bendiksen blei fødd i Bergen i 1948. Han er no busett på Lillehammer, der han arbeider som grafikar og målar. I Rauland stiller han ut grafikk, djuptrykk.
- Eit bilete er ikkje berre for å sjå, men også lytte til, seier han sjølv. Bileta hans med engasjement har ofte også eit samfunnskritisk og humanistisk innhald.
I tillegg arbeida frå dei to kunstnarane står den faste skulptursamlinga til Knut Skinnarland. Utstillinga er ope fram til midten av august.