Bedrifter med 80—90 arbeidsplassar bankar på døra - no er saka utsatt
▶ MIDT-TELEMARK Lokalpolitikarane i handelsbygda fekk tysdag saka med ny sentrumsgrense på bordet.
Kommunedirektøren opna for å utvide sentrumsgrensa. Utval for plan, teknikk og naering i Midt-Telemark kommune vedtok samrøystes å sende saka over til kommunestyret, for å få ein grundigare prosess.
Det var utvalsleiar Øystein Slettebø (Sp) som kom med dette framlegget. Han rekna med uansett vedtak i planutvalet, ville den likevel hamna i det øvste politiske organet i kommunen. Utvalsleiaren opplyste at det er veldig stort engasjement i saka. Han viste til møtet i handelsstandsforeininga Sentrumsringen på Bø Hotell måndag kveld.
– Sentrumsringen er ikkje negative til handelsparken, men dei ønskjer rammer for kva slags handel det skal vere der, sa han.
Kristin Kleppen (H) peika på at det tidlegare har kome kritikk for at kommunestyret ikkje har handsama denne saka.
– Me ønskjer å vere positive og vil ha vekst. Samstundes er det inga ønske om å flytte sentrumsfunksjonar til handelsparken på Grivijordet, sa ho.
Arvid Hagen (Ap) har klart signalisert her i Varden at han ønskjer utviding av grensa. Han sa at det no er snakk om etableringar med 80—90 arbeidsplassar i Bø Handelspark, der Biltema samt Carlsen & Fritzøe er etablert frå før.
– Dette er ikkje årsverk, men kan vere viktige deltidsjobbar for studentar. Handelsparken har 40 tilsette i dag. Både på Notodden og i Seljord lurar dei på kva som skjer, sa Hagen.
Han la til at kommunen kan bli sitjande med skjegget i postkassa om grensa ikkje blir utvida.
– Fleire til bygda, betyr også meir handel i sentrum, understreka Arvid Hagen.