Slight autism iniugnay sa antidepressants habang nagbubuntis
LONDON (Reuters) – Natuklasan sa isang pag-aaral na ang mga batang nalantad sa antidepressant habang ipinagbubuntis ng kanilang ina ay bahagyang mas mataas ang posibilidad na magkaroon ng autism kumpara sa mga bata na ang ina ay mayroong psychiatric disorders ngunit hindi uminom ng antidepressant habang nagbubuntis.
Ngunit sa paglalathala ng kanilang findings nitong Miyerkules, sinabi ng mga mananaliksik na ang mga resulta ay hindi dapat ikaalarma, dahil napakaliit pa rin ng tinutukoy na panganib para magkaroon ng autism ang mga bata.
Karaniwan ang depression sa mga babaeng nasa childbearing age. Sa Europe, sinabi ng mga eksperto na tatlo hanggang walong porsiyento ng mga buntis ang niresetahan ng antidepressants.
Ipinahiwatig sa ilang nauna nang pag-aaral ang kaugnayan ng paggamit ng antidepressant habang nagbubuntis at ng autism sa isinilang na anak, ngunit sinabi ng mga mananaliksik na hindi malinaw kung ito ay dahil sa mismong sakit, sa antidepressants, o iba pang unknown factors.
Para sa pananaliksik na ito, pinagaralan ng grupo ni Dheeraj Rai sa University of Bristol sa Britain ang data ng mahigit 254,000 batang naninirahan sa Stockholm, Sweden, na nasa edad 4 hanggang 17.
Ang kanilang ina ay mga babaeng walang mental illness na uminom ng antidepressants, mga babaeng nagkaroon ng sakit at uminom ng antidepressants habang buntis, o mga babaeng may psychiatric disorders ay hindi uminom ng antidepressants habang nagbubuntis.
Sa 3,342 batang exposed sa antidepressants habang ipinagbubuntis, natuklasan sa pag-aaral na 4.1% ang nasuring may autism, kumpara sa 2.9% ng 12,325 bata na hindi nalantad sa antidepressants na ang mga ina ay may history ng mental illness.
Gayunman, idiniin ng mga mananaliksik na maliit ang absolute risk: Mahigit 95% ng kababaihan sa pagaaral na uminom ng antidepressants habang buntis ay hindi nagkaroon ng autistic na anak.
Sa komentaryo sa tuklas, inilathala sa BMJ British medical journal, sinabi ni Diana Schendel sa Aarhus University ng Denmark na ang findings “should be viewed through the kaleidoscope of possible causes of autism”.
Sinabi niya na ang nakikitang maliit na pagtaas sa panganib na magkaroon ng autism ang bata “must be carefully weighed against the substantial health consequences associated with untreated depression.”