Jos 24:1-13 ● Slm 136 ● Mt 19:3-12
Lumapit kay Jesus ang ilang Pariseo na hangad siyang subukan, at tinanong nila siya: “Pinahihintulutan bang diborsiyuhin ng lalaki ang kanyang asawa sa anumang dahilan?”
Sumagot si Jesus: “Hindi ba ninyo nabasa na sa simula’y ginawa sila ng Maykapal na lalaki at babae, at sinabi rin nitong iiwanan ng lalaki ang kanyang ama at ina, at pipisan sa kanyang asawa, at magiging iisang katawan ang dalawa? Kung gayo’y hindi na sila dalawa kundi iisang katawan lamang; kaya huwag paghiwalayin ng tao ang pinagbuklod ng Diyos.”
At sinabi nila: “Kung gayon, bakit iniutos ni Moises na bigyan ang babae ng kasulatan ng diborsiyo bago siya paalisin?” Sinabi naman niya sa kanila: “Alam ni Moises na matigas ang inyong puso kaya pinayagan kayong diborsiyuhin ang inyong mga asawa, ngunit hindi ganito sa simula. At sinasabi ko naman sa inyo: kung may magpaalis sa kanyang asawa, malibang dahil sa pagtataksil, at saka magpakasal sa iba, nakiapid na siya.”
Sinabi naman ng mga alagad: “Kung iyan ang itinatadhana para sa lalaking may-asawa, walang pakinabang sa pag-aasawa.”
PAGSASADIWA:
Huwag paghiwalayin ng tao ang pinagbuklod ng Diyos.— Kabi-kabila ang mga puwersang nagtatangkang sirain ang sakramento ng Kasal at buhay- pamilya. Patuloy na isinusulong ang diborsiyo bilang solusyon sa hindi pagkakasundo ng mag-asawang pinagbuklod sa matrimonyo.
Maliwanag ang pahayag ni Jesus, “Huwag paghiwalayin ng tao ang pinagbuklod ng Diyos” (b 6). Mananatili ang layunin ng kasal. Ito ay para sa pagbubuklod ng dalawang nilalang sa isang kasunduan o tipang pangmagpakailanman. Anuman ang pagsubok na dumating, anumang hirap ang danasin, gaano man kalaki ang suliranin, mananatili ang buklod ng mag-asawa.