Hkm 2:11-19 ● Slm 106 ● Mt 19:16-22

Lumapit kay Jesus ang isang binata at nagtanong: “Guro, anong mabuti ang dapat kong gawin para makamit ang buhay na walang hanggan?” Sumagot si Jesus: “Bakit tungkol sa mabuti ang tanong mo? Iisa lang ang Mabuti. Kung gusto mong pumasok sa buhay na walang hanggan, sundin mo ang mga utos.” At sinabi naman ng binata: “Anong mga utos?” Sumagot si Jesus: “‘Huwag pumatay, huwag makiapid, huwag magnakaw, huwag manirang-puri ng kapwa, igalang ang iyong ama at ina, at mahalin ang iyong kapwa gaya ng pagmamahal mo sa iyong sarili.’ ”

At sinabi sa kanya ng binata: “Sinunod ko ang lahat ng ito, ano pa ang kulang ko?” At sinabi ni Jesus: “Kung gusto mong maging ganap, umuwi ka’t ipagbili ang mga ari-arian mo at ibigay ang pera sa mga dukha, at magkakaroon ka ng kayamanan sa Langit. At saka ka bumalik para sumunod sa akin.”

Pagkarinig ng binata sa pahayag na ito, umalis siyang malungkot sapagkat napakayaman niya.

PAGSASADIWA:

Ano pa ang kulang ko?— Kulang ang dinuguan kapag walang puto. Kulang ang kare-kare kapag walang bagoong (o alamang). Kulang ang kape kapag walang asukal. Hindi mabuti kapag may kulang. Dapat punuan ang kulang.

Ano ang kulang sa binatang binabanggit sa ebanghelyo? Mukha namang nagawa na niya ang lahat. Pero may isang kulang sa kanya—ang katapangang iwan ang kanyang ari-arian. Kulang ang kanyang katatagan upang sumunod kay Jesus.

Ano ang kulang sa atin? Pagmamahal? Pagpapatawad? Pag-unawa sa kapwa? Pagdamay sa nangangailangan? Paggalang sa karapatan ng iba? Mabuting asal? Magandang pananalita? Maayos na pagkilos? Kalinisan? Kababaang-loob?